Meeqqanik aasarsiortitsineq taperseruk – qujassutitullu assinik atuakkiamik nassitsillutit
Meeqqat aasarsiornerat minnerpaamik 350 kr-nik taperserukku, qujassutitut atuagaq ’The children of Kullorsuaq’ ilinnut nassiutissavarput.
“The children of Kullorsuaq" assinik atuakkiaavoq, assitaralugit meeqqat inuusuttullu aamma avatanngiisit naliitsut peroriartorfigisaat. Assinik atuakkiaq Østrigimiup atuakkiortup, assiliisup eqqumiitsuliortullu Françoise Funk-Salamí-p suliaraa. Assinik atuakkiaq pilersinneqarpoq Françoise-p 2021-mi nammineq kajumissutsimigut sulisut Kullorsuarmi aasarsiortitsinermut peqataareernerata kingorna.
“Atuakkakkut kissaatigivara Kullorsuarmi meeqqat inuusuttullu kiinnertinneqarnissaat avatangiiserisaallu naliitsut peroriartorfigisaasa takutinneqarnissaat.”
Kullorsuaq pillugu Françoise Funk-Salamí oqarpoq: ”Kullorsuaq nunarsuarmi maani avinngarusimaqaaq, issittup nunataanik kusanaqisumik avatangiiseqartoq. Nunaqarfik 450-inik inoqarpoq, taakkualu pingajorarterutaat tassaapput meeqqat imaluunniit inuusuttuaqqat. Kinguaariit nutaat tunniussassaqaqaat isumassarsitsitsisinnaallutillu. Unamminartut annerpaat ilagaat avammut nuttaqqajaasoqartarnera, tamannali Kullorsuup maannamut pitsaaliorsimavaa. Taamaattoq tamanna allanngoriaannaavoq, inuusuttut ilinniariartorlutik Kullorsuaq qimattariaqartarmassuk uteqqinngisaannarsinnaallutillu. Kullorsuarmi kinguaariinnut tulliuttunut kissaatima annersaat tassaavoq tulluusimaarlutik kulturikkut kinassusertik attattuassagaat”
Assinik atuakkiat killeqartut pigivagut. Taamaammat neqeroorut atuuppoq, toqqorsivitsinni atuakkanik nunguutsinissatta tungaanut.