Periusissiaq 2020

Peqatigiiffik Kalaallit Meerartaasa tunaartaqarluni 2020-p tungaanut iliuusissanut pilersaarutigai 1) toqqissisimasumik meeraaneq 2) amerlanerit ilinniagaqarnissaat 3) meeqqanut inuusuttunullu amerlanernut anngunnissarput 4) meeqqanik inuusuttunillu peqataatitsinissaq

1 pillugu) Ukiuni untritilingajanni Peqatigiiffik Kalaallit Meerartaasa ingerlasimanerani toqqissisimasumik meeraaneq qitiulluinnarsimavoq. Ukiunili makkunani sulineq ajornakusoornerulerpoq, tassami suliatsinnut angajoqqaat peqataaneri sukaterinernit eqqorneqarmata. Tamannalu ilungersunartunik meeqqanut kinguneqarpoq. Tassami SFI-mi misissuinernit ilisimavarput, piitsuussuseq annertuunik kinguneqartartoq. Assersuutigalugu piitsussutsip kingunerisarpaa ilinniagaqarnissamut periarfissakinnerulerneq.

2 pillugu) Inuusuttut amerlanerit ilinniagaqalernissaat. Ukiorpassuanngulersuni inuusuttut ilinniagaqarusussusiisa nukittorsarnissaat aammalu ilinniakkap naammassinissaata tungaanut ilinniarnerminnik aallussiinnarnissaat suliniutigaavut. Suliaq tamanna nangipparput nukittorsarlugulu, tassami allannguissagaanni ilinniagaqarneq tassaavoq iliuuseq kinguneqarluarnerpaaq.

3 pillugu) Peqatigiiffik Kalaallit Meerartaasa suliai meeqqanut inuusuttunulu amerlanernut anngutissapput. Imaanngitsoq suliniaqatigiiffiup siaruarnissaa imminermini anguniagaammat. Pingaartuummalli, kalaallit meerartaasa amerlanerit atugarissaarnerulernissaat! Taamaattumik suliarisinnaasatta aaqqissuussamik annertusarnissaat suliniutigaarput, soorlu suliatta ataasiakkaat allanngortittarnerisigut, taamaaliornikkut meeqqat ilaqutariillu amerlanerit peqataasinnaalerniassammata. Pisut ilaanni naleqquttunik suleqatissarsiortarpugut, soorlu Danmarkimi Kalaallillu Nunaanni kommuninik suleqatissatsinnik toqqaasarluta. Kiisalu ukiuni makkanani suliniutinut aqutsineq Københavnip avataanut, Aalborgimut Nuummullu nuuppavut taamaaliornikkut; najukkami sunniuteqarnerusumik sulisinnaajumalluta.

4 pillugu) Meeqqanik inuusuttunillu peqataatitsineq. Kalaallit meerartaasa inuusuttaasalu misilittagaat soorunami piffissami sivisuumi tusarnaarluarniartarsimavavut. Ullumikkulli suliniutissavut suliassavullu pilersaarusioraangatsigit, tamatigut meeqqat inuusuttullu peqataatinneqarnerat aaqqissuulluakkamik qitiutillugu ingerlatsivugut. Kalaallit Nunaanni suliatsinni Najortimi, meeqqat oqartussaasunik naapitsinerminni allanit akuliuffigineqaratik namminneq illersorteqartittarpavut, tamannalu meeqqat inuusuttullu namminneq nipaasa tusarneqarnissaannik qulakkeerinninniarnermi qitiulluinnarpoq.

Iliuusissanut pilersaarut tamaat uani atuaruk: Iliuusissanut pilersaarut 2020