19.10.20

”Utertitaqarlunga tunniussaqarnissara uannut pissusissamisuuginnarpoq”

Chris Paton atuakkiortutut Christoffer Petersen-imik imminut taasartoq, atuakkiornermik oqaluttualiornermillu inuussuteqarpoq, atuakkianilu nammineerluni Amazon aqqutigalugu saqqummersittarlugit. Atuakkiaasa amerlanersaat Kalaallit Nunaanni pisimasuutinneqarput, kalaallinillu pingaarnertut inuttaqarlutik. Toqqarsimavaa sinneqartoorutimi ilai Kalaallit Meerartaasa suliniutaanut atorneqassasut.
Chris Paton 2006-imiit 2013-imut Kalaallit Nunaanniippoq. Uummannami, Qaanaami Nuummilu najugaqarnikuulluni.

Chris Paton-ip atuakkiaminit sinneqartoorutit ilaasa Kalaallit Meerartaannut tunissutiginiarlugit aalajangernerminut patsisaasoq oqaluttuaraa, tassaanerarlugu utertitsilluni tunissuteqarneq. Chris oqaluttuarpoq: ”Ukiuni arfineq-marlunni Kalaallit Nunaanni ilinniartitsisuuvunga, tamaanilu inuit naapitakka, minnerunngitsumillu taakku nukittussusaat, ullumikkut atuakkiorninni annertuumik isumassarsiorfiupput. Taamaalilluni pissusissamisuuginartutut misinnarpoq utertitaqarluni tunniussaqarnissaq, minnerunngitsumik meeqqanut”, Chris Paton oqarpoq, tassami meeqqani naammattoorpai tunniutiinnarumanngissuseq inuummarissuserlu immikkut ittut, Danmarkimi imaluunniit nammineq kingoqqiffimmini Tuluit Nunaanni assingusumik naammattoorsimanngisaannakkani. Chris oqaluttuarpoq:

Piumassuseq angingaartoq naammattoorpara

”Ilinniartitsisuunerma nalaani misilitsinnerni naliliisartutut angalasarpunga, meeqqanillu naapitaqartarlunga nunaqarfimminni annerusumik minnerusumilluunniit imminnut tuluttut ilinniartissimasunik. Taakku meeraapput inuusuttuullutillu assigiinngitsunik atugaqaraluarlutik, angusaqarumallutik ilinniagaqarumallutillu sorsuuteqartut. Meeqqat taakku tamatigut piginnaaneqarluartunik ilinniartitsisoqartanngillat, taamammat angusaqarnianerminni nukittusaqaat annertoqisumillu piumassuseqarlutik. Tamanna assut killitsissutigaara”, Chris oqaluttuarpoq. Chris ilinniartitsisutut naammattuugaqartarsimavoq meeqqanik pitsaasumik peqqissumillu inuuneqartunik, aammali naammattoorsimallugit meeqqat artornartorsiortut. Chris oqaluttuarpoq: ”Uummannami ilinniartitsisuunera aamma immikkut atuartitsinermut immikkoortumi pisortaanera pissutigalugit pitsaaliuinermut ataatsimiititaliami ilaasortaavunga, tassanilu kommunimi tarnip pissusiinik ilisimasallit, peqqissaasut, politiit isumaginninnermilu siunnersortit meeqqat ilaqutariillu atugarliornerusut sullittarpaat. ”Tassami aamma meeraqarpoq ilaqutareeqarlunilu ingerlalluanngitsunik, Chris oqarpoq, kisiannili aamma Kalaallit Nunaata illuinnaasiortorujussuarmik oqaluttuareqqajaaneqartarnera qatsunnerarlugu.

2017-imiit Chris Paton-ip atuakkat 12-it oqaluttualiallu 28-t Kalaallit Nunaanni pisimasuutitat saqqummersinnikuuai.

Kalaallit Nunaannik soqutiginninneq

”Kalaallit pillugit isummereertarnerit, tamanillu assigiissiitsisarnerit aamma kalaallit tamarmik imerajuttuullutillu illuikkani najugaqarnerarlugit oqaluttuat qatsuppakka”, Chris oqarpoq. Atuakkiamini oqaluttuat allarluinnaat saqqummiuttarpai: ”Inuttarititannut isumassarsiffiupput inuit piviusut, ullutsinni inuusut, Kalaallit Nunaanniinni naapittakkakka; inuit nukittuut oqaluttuassarpassuallit, namminnerlu inuunerminni pingaarutilinnik angusaqarnissaminnut nukissallit allanillu pitsaasumik sunniisinnaasut”. Tamakkuuppullumi oqaluttuat nunarsuarmi tamarmi soqutiginartinneqartut. Chris Paton-ip atuakkiai amerlanerpaat USA-mi tunisaasarput, tamaaniippullu inuit Kalaallit Nunaat pillugu ilisimasaqaqqalaartut, Kalaallit Nunaannik soqutiginnilersinneqartut assersuutigalugulu Kalaallit Nunaannut takornariarumalersut. Chris Paton oqaluttuarpoq: ”Ukiuni pingasunngulersuni atuakkiami tunisarnerat inuussutigaara, soqutigineqarnerpaallu tassaapput Kalaallit Nunaanni pisimasuutitat. Atuakkiama tuninerisigut Kalaallit Nunaat pillugu oqaluttuat allaanerusut ullutsinnullu naapertuunnerusut saqummiunnerinut peqataasinnaaguma, qujanassaqaaq”

Atuakkamit “The Heart that was a Wild Garden”-imit isertitat ilanngarneqaratik Kalaallit Meerartaannut tunniunneqassapput.

Christoffer Petersenip atuakkiai pillugit anertunerusunik uaniittoqarpoq: www.christoffer-petersen.com