19.10.20

”Tulluusimaarlunga naammagisimaarinnillungalu suliap ingerlateqqinnissaa tunniuppara”

Ukiuni 15-ini Kalaallit Meerartaasa siulersuisuini ilaasortaareerluni siulittaasup Kirsten Bitsch-ip tunuarnissani aalajangiuppaa. ”Suut tamarmik killissaqarput”, Kirsten Bitsch oqarpoq, nuannaarutigaaralu siulittaasutut atorfik siulittaasunngortumut tunniussinnaagakku, Kalaallit Meerartaasa kattuffittut nukittuseruttorlunilu ineriartorlualeruttornerata nalaani.

”Ukiuni 15-ini peqataaffigisanni peqatigiiffimmi assigiinngtsorpassuarnik pisoqarpoq, minnerunngitsumillu ukiuni 100-nngulersuni peqatigiiffiup atuuffigisaani pisimasunut sanilliussisagaanni”. Kirsten Bitsch nassuiaavoq: ”Kalaallit Nunaanni nikeriarnikuuvugut, tassaasinnarluta peqatigiiffik ajunngitsuliortoq, maanna tassaalerluta Kalaallit Nunaanni kattuffiit suliaqartullu allat naligiimmik suleqatigisaat. Assersuutigalugu Kalaallit Nunaanni kommunit meeqqanik illersuisoqartitsisarnitsinnut Najortimut atatillugu suleqatigilluarpagut, aammattaaq Danmarkimi suleqateqarluarnigut politikkikkullu tapersersorneqarnerput pingaaruteqarpoq, ilaatigut suliniutitsinnut ”Et Bedre Liv”-imut atatillugu, tassuunakkut kalaallit meerartaasa ilaqutariillu kalaallit Danmarkimiittut atugarisaannik pitsanngorsaaneq iluatsimmat. Tamakkua nunnaarutigeqaakka”.

Paquminartut paquminarunnaarsagaapput

”Isumaqarpunga ”Kalaallit Meerartaat” ineriartornerminni manna pitsaasumik killiffeqartoq, oqartussaaqataanissamut annertuunik periarfissaqarluta, tamannalumi pisariaqartinneqarpoq”, Kirsten erseqqissaavoq nangillunilu: ”Ersarilluinnarpoq meeqqat kalaallit pitsaanerusunik atugaqarfigilersinnaasaat suli arlaqartut. Kalaallit Nunaanni inuusuttut suli ikippallaat ilinniagaqartarput, aamma kinguaassiuutitigut innarliinerit sumiginnaanerillu pillugit kisitsisit imminerminni oqaluttuartuupput. Qujanartumik ullumikkut tamakku allaanerulluinnartumik ammaffigineqarput, tamatumalu kingunerisaanik, innuttaasut politikerillu akornanni annertuumik nikeriartoqarnikuuvoq, ineriartornerup illuanut saatinneqarnissaanik piumasaqarfiusumik. Tamanna aallaavissaavoq pingaaruteqarluinnartoq, isumakkeerfigeqatigiinneq pisariaqartoq pilersinneqassappat”.

“Kalaallit Meerartaat kattuffiuvoq ineriartorluartoq”, siulittaasutut tunuartoq Kirsten Bitsch oqarpoq.

Qallunaat Kalaallit Nunaat kalaallillu pillugit ilisimasakippallaarput

Damark qiviarutsigu, Kirsten Bitsch naapertorlugu, sulissutigisassat arlaqarput: ”Anniaatigisarpara misigigaangakku, Kalaallit Nunaata soqutigineqarnera qanoq annikitsiginersoq. Allaammi Danmarkimi aaqqissugaanerup ilaani, innuttaaqataasunik kalaallinik sullissiffiusuni, Kalaallit Nunaat kalaallillu kulturiat pillugu ilisimasaqarneq naammanngilluinnarpoq. Naalagaaffeqatigiiffimmi inuuvugut, kisianni ataatsimooqatigiiffitsigut assiigiingissutsitsigullu pisuunnguallaataasussat pillugit paasinninneq amerlanertigut takussaasanngilaq. Allaanngilaq qallunaat innuttaaqataasut allamiut naaperiartaraat, sutigut tamatigut qallunaatorluinnaq pissusilersorlutillu akulerulluinnarnissaat piumasaralugu. Qallunaajussuseq nerukitsuararsuanngortinneqartarpoq, puigortarparpullu assigiinngitsuuneq tassarpiaammat  pisuunnguallatsitsisartoq. Pitsaanerusumik iliuuseqarsinnaavugut”, Kirsten isumaqarpoq.

 

Suleqatigiinneq siunissamut aqqutissaavoq

Kalaallit meerartaasa atugarisamik suli pitsaanerulersitsiniarluni, qanoq iliorluni pitsaanerpaanik angusaqartoqarsinnaanera apeqqutigineqarmat Kirsten akivoq: ”Suleqatigiinnikkut angusaqartarpugut, tamatumanissaaq isumaqarpunga annertuunik pisoqarnikuusoq, Kirsten  oqarpoq, nassuiaallunilu: ”Kalaallit Nunaanni politikkikkut sivisuumik nittarsaakkumaneqarnikuuvoq, suut tamarmik nammineq isumagineqarsinnaasut, – sapiissuseqartariaqarpoq sassassalluni oqarlunilu imminut tulluusimaarutiginermit immaqalu imminut tatitiginermit kimillanneqartumit pingaarnerusoqartoq,- tassalu assersuutigalugu meeqqat. Ukiuni kingulliunnerusuni marlussunni suleqatigiinnissaq annertunermik piumassuseqarfigineqarpoq, kingullertut qallunaat kalaallillu isumaginninnermit ministeriisa isumaqatigiissutaata nutaap, uppernarsapaa suleqatigiinnissamut piumassuseqartoqartoq, tassuunakkullu pingaarutilimmik nalunaarutigineqarluni, Kalaallit Nunaanni meeqqanut naleqqiullugu nukissarisat tamarmik ataatsimoortinnissaat pisariaqartinneqartoq. Nuannaarutigaara kattuffitta taama nukittutigaluni inissisimalernikuunera, tassuunakkut piviusumik susassaqartullu pikkorissut allat suleqatigalugit, Kalaallit Nunaanni meeqqanut allannguutinik ataavartussanik pilersitsisinnaalerluta”.

Kirsten Bitschip siulittaasutut taartigaa Heidi Lindholm, ukiuni kingullerni tallimani siulersuisunut ilaasortaasoq, 2019-imiillu siulittaasumut tullersortaasoq. Heidi Lindholm Nuummi tarnip pissusiinik ilisimasalittut sulivoq. Siulittaasup tulliatut nutaatut inissippoq Andreas Hjort Frederiksen, ukiuni kingullerni sisamani siulersuisunut ilaasortaasoq.