25.11.18

Taamaammat nersornaasigaavugut

Aalborgimi Musikhuset-imi arfininngormat unnukkut kunngissaq Frederik nuannerluinnartunik oqaaseqarpoq. Tassani tunngavilersorpaat sooq Peqatigiiffik Kalaallit Meerartaat Kunngissakkut Isumaginninnikkut Nersornaasiuttagaannik 2018-imi nersornaaserneqarnersoq.

Tunngavilersuut

Meeqqat inuusuttullu tamarmik ataqinnassusilimmik inuuneqarnissartik pisinnaatitaaffigaat, tusaaniarneqarlutik takorluukkamillu piviusunngortinnissaannut periarfissaqarlutik. Kisiannili periarfissaminnik atorluaasinnaassagunik pisariaqartippaat attaveqaateqarluarlutik peroriartornissartik, inerikkiartornerminni imminnullu upperinissaminnik tapersersuisunik. Ajoraluartumik kalaallit meerartaannut tamanut taamaanngilaq. Amerlasuummi peroriartortarput angerlarsimaffimmi eqqissiviilliornermik sumiginnaanermillu atugaqarfiusumi, taamaalillutillu inuunerminni arlalitsigut imminut naleqartinnginneq inuttullu ajornartorsiutit sorsugassarilersarlugit.

Peqatigiiffik Kalaallit Meerartaat kalaallit meerartaasa atugarisaat pillugit qasusuilluni ataavartumillu suliuarpoq – Kalaallit Nunaanni Danmarkimilu. Anguniagaqarluartunik suliniuteqarnerit aqqutigalugit kalaallit meeqqat inuusuttullu toqqissisimasumik meeraanissaat, ilinniagaqalernissamut periarfissinneqarnissaat aamma suliani namminneq inuunerminnut tunngasuni tusaaneqarlutillu peqataatinneqarnissaat peqatigiiffiup sulissutigivaa.

Peqatigiiffik Kalaallit Meerartaat peqatigiiffiuvoq piffissap ingerlanerani ineriartortuarnikuusoq. Inuiaqatigiinni kalaallini danskinilu maannakkorpiaq unamminartuusut naapertuuttullu isiginiartuartarpaat – tamatigullu ajornartorsiutinut suliarisaminnut naleqqiullugu ataqqinnittumik, alapernaatsumik paasinittumillu pissuseqarlutik suleriaaseqarlutik. Meeqqat inuusuttullu periarfissarisaat isiginiartuarpaat – inuttullu ilivitsutut ineriartornissaannut tapersersortarlugit, periarfissarisaminnik tamarmiusunik piviusunngortitsilluarsinnaaqqullugit.