12.12.19

Suleqatigiilluarneq meeqqat sullilluarneqarnerannik kinguneqartarpoq

Meeqqat pisinnaatitaaffii Nuummi isummersoqatigiinnermi ukkatarineqarput

”Oqaatigineqareerpoq, oqaatigineqareernerali eqqortuunnginnerulersitsinngilaq; “Suleqatigiikkaangatta meeqqanut sullissilluarnerusarpugut”. Inuussutissarsiornermik aallussallit, suliniaqatigiiffiit naalakkersuisunut attuumassuteqanngitsut, innuttaasut politikerillu tamarmik akisussaaqataapput”. Aallattoqarfimmi pisortaq Nike Berthelsen taama oqarpoq. Taanna allattuuneq Puk Draiby peqatigalugu NAKUUSA-p UNICEF-illu meeqqat pisinnaatitaaffii taamatuttaaq Naalagaaffiit Peqatigiit anguniagaat pillugit isummersoqatigiisitsineranni peqataavoq.

Naalagaaffiit Peqatigiit meeqqat pillugit isumaqatigiissutaat novembarip ulluisa 20-anni ukiut 30-nngortorsiorpoq, tamatumunngalu atatillugu NAKUUSA UNICEF-ilu Naalagaaffiit Peqatigiit meeqqat pillugit isumaqatigiissutaat nunarsuarlu tamakkerlugu ineriartortitsinissamut anguniagaat pillugit isummersoqatigiisitsinersuarmik aaqqissuusseqqammeruttorput. Sulisitsisut, politikerit taamatuttaaq kommuninut taamatuttaaq Namminersorlutik Oqartussanut sinniisut aamma meeqqanut kattuffiit kulturikkut illorsuarmi Katuami Nuummiittumi ulluni marlunni kateripput. Meeqqat pisinnaatitaaffiisa Kalaallit Nunaanni sapinngisamik pitsaanerpaamik naapertorneqarnissaasa qulakkeernissaannut oqallillutillu workshopperput.

Immikkut sulissanngilagut

Kalaallit Meerartaat Meeqqat Inuusuttuaqqallu Suliniaqatigiiffiup ilaatut apeqqutit ilaat una tunngavigalugu oqallinnermi peqataavoq:

Inuussutissarsiornermik aallussallit, suliniaqatigiiffiit naalakkersuisunut attuumassuteqanngitsut, innuttaasut oqartussaasullu; Sutigut immitsinnut pisariaqartippugut?

Nike Berthelsen nassuiaavoq: ”Kalaallit Nunaanni suleqatigiilluarnerusariaqarnitta ilisimasatsinnillu avitseqatigiinnerusariaqarnitta nassuerutigineqartarnera annertusiartorpoq. Tamanna qujanarpoq, tamattami misilittakkatsinnik avitseqatigiiffiunngitsumik immikkut suligaluarutta suliniuteqaraluaruttalu iluaqutaanavianngimmat. Suleqateqarusussuseqarpugut, taamaattumik suliatigut soqutigisaqaqatigiiusugut periusissanik pitsaasunik pilersitseqatigiittariaqarpugut. Taamaaliornikkummi angusaqarluarnerujumaartugut qularnanngilaq”.

Piumassuseqarpugut

Puk Draibyp oqarnera naapertorlugu suleqatigiinnissatsinnut piumassuserput annertuseriarsimasoq isummersoqatigiinnitsinni malunnartumik erserpoq. “Tamannami Najortimik taallugu meeqqanut illersuisussusaqartitsinermut aaqqissuussarput pillugu Kalaallit Nunaanni kommuninik suleqateqarnitsitsigut, aammali Kalaallit Nunaanni illoqarfinni assigiinngitsuni ukiut tamaasa soorlu aasaanerani tammaarsimaartitsisarnitsigut nammineq misigisarparput. Assersuutigalugu illoqarfinni assigiinngitsuni sunngiffimmi sammisassaqartitsinermut aqutsisut illoqarfigisaminni timersortarfimmik atuinissatsinnut aamma innuttaasut – sammisassaqartitsinerni assigiinngitsuni meeqqat aasarsiorluarnissaannut sunniuteqaqataasartuni – peqataanissaannut qulakkeerisuusarput”. Suliatigut susassareqatigiiusugut suleqatigiilluarnerulernissarput ukkatarineqartorujussuusoq qularnanngilaq, tamannarpiarlu oqallinnerpassuarni workshoppernerpassuarnilu eqqartorparput. Taamaattumik eqqartuiinnarnermiit iliuuseqarnissatsinnut tamatta soorunami akisussaaqataavugut”, Puk Draiby oqarpoq.

Eqqartuiinnarunnaarniarta

Unammillernartoq unarpiaavoq; Peqatigiiluartuusugut; tassa suliniaqatigiiffiit naalakkersuisunut attuumassuteqanngitsut, inuussutissarsiornermik aallussallit oqartussaasullu akornatsinni suleqatigilluarnissatsinnut qanoruna ililluta eqqartuiinnarnermiit suliniutinik pilersitsinermut ikaarsaarniarnersugut, Meeqqat Inuusuttuaqqallu Suliniaqatigiiffiata workshoppertitsinerani apeqqutigineqartut ilagaat. Nike Berthelsen apeqqummut tamatumunnga atatillunga nassuiaavoq:

”Piviusunngortitsinissarput pisariaqarpoq, taamaattumillu oqartussaasunut siunnersuuteqarpugut. Naggataatigut meeqqap ikiornissaanut ajoqutaasumik akunnermiliuttorpassuaqarfiusumik atorfilittaqarfiuallaartumillu allaffissornermi ingerlatsineq eqartorujussuaq sukannernerulersittariaqartoq politikerinut ersarissumik kajumissaarutigaarput. Taamaattumik piumassuseqarnerput naammanngilaq, meeqqanulli iluaqutaasumik suleqatigiilluarnissatsinnut akornutaasunik alaatsinaannissatsinnut sapiissuseqartariaqarpugut”.

 

Meeqqat pisinnaatitaaffii pillugit Katuami Nuummiittumi 2019-mi novembarip ulluisa 27-anni 28-annilu isummersoqatigiittoqarpoq