22.06.21

Persuttaasarnermik annikillisaaniarluni ataatsimoorneq

Kalaallit Meerartaasa suleqatigisartakkani ilinniartitsinermi atortussanik inuusuttut akornanni nakuusertarnermik pinaveersaartitsinissamik annikillisaanissamillu siunertaqartunik inerisaanissamut suleqatiserai. Atortussat taaguutigissavaat TASSA! TASSA! Isumaqarpoq: Naammaleqaaq!

Ilinniartitsisut, atuartitsinermi siunnersortit, persuttaanermik pitsaaliuinermik immikkut ilisimasallit aamma Ilinniartitaanermut Aqutsisoqarfimmit, Isumaginninnermut Aqutsisoqarfimmit aamma ’Pinerlutsaaliuinermut Siunnersuisoqatigiinnit peqataatitat, Nuummi Kalaallit Meerartaat ulluni pingasuni workshoppertitsimmata naapeqatigiipput. Workshoppip siunertaraa TASSA!-p inerisarnissaanut sinaakkutissat pilersinnissaat.

”Pingaartuuvoq ataatsimoorussamik suliamut tunngatillugu tunngaveqarnissarput, aamma inuusuttut qanoq kaammattornissaat pillugu ilisimasat ilaatinnissaat. Atortussiat sutigut atorneqarsinnaasunngorlugit inerisassavagut, klassit sorliit saaffigineqassappat, aamma persuttaasarnerup pinaveersaarnissaa pillugu ilisimatusarnikkut paasisat suuppat? Taama oqarpoq Nuummi Kalaallit Meerartaanni allattoqarfimmi pisortaq Julie Lynge, nangillunilu: ”Aalajangigassat amerlaqaat, pingaartuuvorlu suliamut tunngatillugu ilisimasat tutsuiginartut aallaavigalugit aalajangiisoqarnissaa. Taamaammat aamma qujanarpoq suleqatigisakkagut taama amerlatigisut TASSA!-mut katersuutsissinnaagatsigit, ataatsimoorlutalu suliniummut sammiviliisinnaagatta.

Arlaliulluni persuttaasarneq ernumanaatilimmik atugaajartorpoq

Workshoppimi peqataasut ilagivaat Mette Abildgaard Jensen, Kalaallit Nunaanni Politiit Pinaveersaartitsinermut Misissueqqissaarnermullu immikkoortortaqarfiani PiSiu-mut allattaasuni sungiusarluni sulisoq. ”Suliffeqarfinni marlunni tamani persuttaasarnermik pitsaaliuinermik suliaqarpugut, tamannalu pillugu ilisimasanik assersuutigalugu uanga ilassuteqarsinnaavunga, assut ernumanartutut allanngoriartorneq misigivarput, tassalu arlaliulluni persuttaasarneq, inuusuttut arlaliullutik inuusuttoqamminnik saassusseriarlutik videoliarineranik attaveqaatitigut saqqummiisarnerat, tamannarpiarlumi sammisatta aalajangiiffigisattalu ilagaat: Arlalilulluni persuttaasarneq TASSA! Kalaallit Nunaanni 7. aamma 8. klassinut tamanut saqqummiunneqarnissaa qitiutinneqassaaq.

Mette Abildgaard Jensen Nuummi workshoppi pillugu oqarpoq: ”Pingaarutilinnik aalajangiussaqarpugut, TASSA!-mik pitsaasunik sammivissiisussanik.”

Arlaliuneq iluaqutaavoq

Suleqatigiit taama assigiinngisitaartigisunik inuttallit, ilinniartitsinermik persuttaasarnermillu pitsaaliuinermik suliaqartut politikkimullu attuumassuteqartut suleqatigiissinnerat annertuumik iluaqutaavoq,taama isumaqarpoq Mette Abildgaard Jensen. ”TASSA! Nuna tamakkerlugu siammaanneqartussaavoq, taamaammat pisariaqarpoq susassaqartut arlallit piginneqataasutut misiginissaat, TASSA!-llu iluatsinnissaanut suleqataanissaat. Persuttaasarneq inuiaqatigiinni annertusiartorpoq, inuusuttullu akornanni pitsaaliuinissaq pisariaqarpoq, allanngoriartorneq ernumanartoq illuatungaanut saatikkumallugu”, oqarpoq, nangillunilu: ”Tamannalu iluatsilluarnerpaasinnaavarput, arlaliulluta siunniussaq ataaseq sulissutigigutsigu”.

Suleqatigiit tullianik naapissapput 2021-mi oktoberimi.

Ilimagineqarpoq TASSA! Kalaallit Nunaanni meeqqat atuarfiinut anngutissasoq 2022-mi januaarimi. Tamanna sioqqullugu atortussiat atuarfinni assigiinngitsuni tallimani misiligarneqassapput. TASSA! Kalaallit Nunaanni meeqqat atuarfiinni 7., 8. aamma 9. klassini ukiumut sapaatip-akunnera ilivitsoq ingerlanneqartassaaq. Tamatumani atuartut TASSA!-mut tunngasuinnarnik sammisaqarlutillu suliaqartinneqartassapput.