29.03.21

Persuttaasarneq unitsinniarlugu kalaallit inuusuttut piginnaanngorsarneqassapput

Kalaallit Meerartaasa aamma PiSiu-p akornanni suleqatigiilernerup inuusuuttut akornanni persuttaasarnerit pitsaaliornissaaannik annikillisarnissaallu qitiutippaa. Saaffigineqartut tassaapput meeqqat atuarfianni atuartut angajulliit.

Kalaallit meeqqat inuusuttullu pingajorarterutaat persuttaasoqartarnera takornartarinagu peroriartortarput. Ilaat namminneq persuttagaasarput, allallu angerlarsimaffimminni persuttaasoqartarneranik takunnittuusarlutik. ”Tamanna imaannanngitsunik, meeqqallu ingerlalluarnissaannut, atuarnerannut avatangiiserisaminnullu tatiginninnerannut sunniuteqartarpoq. Tamakkualu atugaanerat suliniuteqarnitsinni annertuumik malugisarpagut”, Kalaallit Meerartaanni allattoqarfimmi pisortaq Julie Lynge oqarpoq, nangillunilu: ”Persuttaasarnerit kingunipilui annertoqaat. Taamaammat aamma nuannaarutigivara PiSiu suleqatigalugu persuttaasarnernik pitsaaliuinissaq maanna isiginialeratsigu. Meeqqat inuusuttullu persuttaasarneq pillugu ilisimasaqalersinnissaat, iliuuseqarnissamut periarfissaasa patajaallisarnissaat peqqinnartumillu attaveqatigiinnernut ilaatittalernissaat pisariaqartinneqarpoq”.

Bjørn Tegner Bay, PiSiu-mi, tassalu Kalaallit Nunaanni Pinerlutsaaliuinermut Siunnersuisoqatigiinni siulittaasoq naapertorlugu, saaffigisarpianut naleqqiullugu pitsaaliuilluni suliniuteqarnissaq pisariaqartinneqaqaaq: ”2020-mi persuttaasarnerit inuusuttullu pinerluuteqarneri nalunaarutigineqartartut amerleriarnerat misigivarput. Nuuk kisiat qiviaraanni, siorna maani persuttaasoqartarnera 22 procentimik qaffariarpoq. Qaffariaammut ernumanartumik pissusilersortoqartarnera ilaavoq, tassalu inuusuttut inuusuttoqatiminnik saassussisarnerat. Tamatuma suliniuteqartoqarnissaa pisariaqalersippaa, inuusuttut persuttaasarneq unitsinniarlugu piginnaanngorsartariaqarlutik, periusissaannillu allanik ilinniartinneqartariaqarlutik”.

Persuttaasarneq pitsaaliorniarlugu suliniut taaguteqarallarpoq: TASSA! (Nu er det nok!). Suliniummut ilaatigut ilaassapput meeqqat atuarfianni angajullernut ilinniartitsinermi atortussat.