25.06.20

Oqaatsitigut piginnaanngorsaaneq kalaallit inuusuttut Danmarkimi periarfissarissaarnerulernissaannut aallaaviussasoq

Namminersorlutik Oqartussat inuusuttut nunatsinniit Danmarkimi efterskolertut patajaannerulernissaannut aningaasaliipput. Kalaallit inuusuttut oqaatsitigut piginnaanngorsarnerisigut danskisut piginnaanngorsarneqassapput.”Danskisut piginnaasaqarneq Danmarkimi Kalaallit Nunaannilu ilinniakkamik aallartitsinissamut tunngaviuvoq. Tamannalu efterskolimi atuartunik allanik danskinik attaveqaqateqarnissamut aamma pingaaruteqarluinnarpoq”, Kalaallit Nunaanni ilinniartitaanermut aqutsisoqarfiup ilinniartitaanermi nakkutilliisua, Brita Toft Hyldgaard, oqarpoq.

Oqaatsitigut piginnaanngorsaaneq Ilinniartitaanermut Aqutsisoqarfiup, Kalaallit Meerartaata Galtrup Efterskolellu suleqatigiinnerisigut pilersinneqarpoq. Inuusuttut oqaatsitigut ukiaanerani atuanngiffeqarnermi piginnaanngorsarneqarnerminni danskit oqaasiinik ilinniartinneqassapput. Tamatumali saniatigut danskisut aamma oqaloqatigineqangaatsiartassallutillu kulturikkut naapeqatigiinneq ukkatissavaat. Brita Toft Hyldgaard oqaluttuarpoq: ”Kalaaleq inuusuttoq Danmarkimut efterskoleriartorluni tikikkaangami nutaanik sungiusimasaminit allaaneroqisunik misigisaqartarpoq, taamaammat inuusuttut nutaarpassuarnik misigisaqarnerminni ilikkariartornerminnilu neriuginartumik toqqissisimanissaat anguniarlugu danskit kalaallillu ataqatigiissilernissaat aamma pingaaruteqarpoq”.

Toqqissisimatissavagut

Kalaallit inuusuttut toqqissisimanissaat ilisarisimasamminnillu attaveqaqateqarnissaat suliniummi Allumi Kalaallit Meerartaata nunatsinniit Danmarkimi efterskolertunut neqeroorutaani siunertarpiaavoq. Bjarke Flyvholm suliniummi Allumi aqutsisuuvoq. Taanna ima oqarpoq: ”Inuusuttut efterskolernerminnik naammassinnittartut amerlanerulernissaat Allumi sulissutigaarput, tamatumanilu inuusuttut toqqissisimatinnissaat anersaartorfissaqartinnissaallu pingaaruteqartoq ilisimavarput. Kalaallit inuusuttut nutaarpassuarnik misikinikuunngisaannakkaminnillu nalaataqartarput. Nunartik qimallugu nunami allami ungasissumiipput, allanillu kultureqarfiusumiillutik. Oqaatsitigut aamma aporfeqartarput, tamannalu kalaallit inuusuttunut amerlasuunut unammillernartuuvoq. Taamaammat Ilinniartitaanermut Aqutsisoqarfimmik suleqateqarnitta kalaallinut inuusuttunut taama neqeroorsinnaanitsinnik kinguneqarnera nuannaarutigaarput”.

Inuusuttut Danmarkiliartussat ikinnerusut

Kalaallit inuusuttut Danmarkimi 2019/2020-mi efterskolertut ilimagisamit ikinnerupput. Kalaallit Danmarkimi efterskolertut corona pissutigalugu angerlajaarput, hunnorujulikkuutaallu neriuutigisamittut ukioq atuarfiusoq naammassinngitsoorpaat. Coronap tuniluutileqqeratarsinnaanera ukiumut atuarfiusussamut tulliuttumut aamma sunniuteqarpoq. Brita Toft Hyldgaard ima oqarpoq: ”Inuusuttut Danmarkimi efterskolernissaminnut Namminersorlutik Oqartussanit siorna tapiiffigineqartut 273-iupput. Ukioq manna efterskolernissaminnut tapiiffigineqareersut maannamut 161-iupput. Amerlassusaat allanngortuarput, ukiumili atuarfiusussami tulliuttumi qassiujumaarnersut suli nalorninarlunilu ilisimaneqanngilaq.

Suliniummi Allumi aqutsisoq, Bjarke Flyvholm, ima oqarpoq: ”Kalaallit inuusuttut oqaatsitigut piginnaanngorsarusullutik nalunaartut amerlassasut, Allumi neriuutigaarput. Oqaatsitigut piginnaanngorsaanitta saniatigut iluaqutaalluarsinnaasorpassuarnik nuannersorpassuarnillu sammisassaqartitsisarpugut, kalaallillu inuusuttut Danmarkimi efterskolernerminni nuannersorsuarnik misigisaqarnissaat tamaviaarluta angorusupparput”.

Kikkulluunniit Allumi peqataajumasinnaapput. Danmarkimi efterskolernermik nuannernerulersitsisartumi peqataanissamut uani nalunaartoqarsinnaavoq.

https://www.collect.nu/FGB/Allu2020/2021

Allumi kajumissutsimik suleqataarusuppit? Paasisaqarnerorusukkuit una tooruk