08.05.19

Nunarsuarmi nunanit tamalaaneersut Kommuneqarfik Sermersuumut tikikkaangata pisartut

Assinik Katuami Nuummiittumi saqqummersitsinermi Kommuneqarfik Sermersuumi aasaanerani tammaarsimaartitsinerni pinnguaatigitinneqarsimasut, ilinniartitsissutigineqarsimasut ataqatigiissitseriaaserineqarsimasullu ukkatarineqassapput.

Kommuneqarfik Sermersuup illoqarfiini aasaanerani tammaarsimaartitsinerni assilisat kulturikkut illorsuarmi Katuami saqqummersitsinermi ullualuit qaangiuppata ammarneqartussami alakkarneqarsinnaanngussapput. Meeqqat pinnguarneranni, imminnut unammillernermikkut killissaminnik qaangiisarneranni Kalaallit Nunaatalu avataani misigisassarsiorneranni assilisat Peqatigiiffik Kalaallit Meerartaat sinnerlugu kajumissutsimik sulisunit assilisaapput.

Tammaarsimaartitsinerit pinnguaateqartitsinertallit ilinniartitsinertallillu

Peqatigiiffik Kalaallit Merartaat-mi allattoqarfimmi aqutsisoq Nike Berthelsen ima oqarpoq: ”Nuannisaqatigiiffiusunik ataatsimooqatigiisitsisarnernik salliutitsinermik ukkassiumalluta meeqqallu aasaanerani nuannersumik allanillu misigisaqarfiusinnaasumik feeriarsinnaanissaannut periarfissaqartikkumallugit assinik saqqummersitsinissatsinnut isumassarsivugut. Meeqqqat peqataasut ataqatigiilertarnerat kajumissutsiminnillu sulisut nunanit tamalaaneersut Kalaallit Nunaannukartarnerat siunissaq ungasinnerusoq qaninnerusorlu eqqarsaatigalugit pingaaruteqarput. Nike Berthelsenip erseqqissaatigaa tammaarsimaartitsinerit naammassineqareerangata tamatigut nalilersuisoqartartoq.

”Nalilersuisarnitsinni paasisatta ersersippaat meeqqat nuannersumik pissanganartumillu aasarsiorsimanertik saniatigut nutaanik ilikkagassarsiortartut, nutaanik ikinngutitaartortartut oqaatsitigullu piginnaasaqarnerulertartut. Meeqqat Ittoqqortoormiini 2018-imi tammaarsimaartitsinermi peqataasut immersuisinneqarnermikkut apersorneqartut 73 procentii tuluttut piginnaasaqarnerulernerarsimapput”, Nike Berthelsen oqaluttuarpoq, erseqqissaatigaalu Peqatigiiffik Kalaallit Meerartaat Kommuneqarfik Sermersuumi aasaanerani tammaarsimaartitsisarnerminut tapersersorneqarluarsimasoq.

”Kommuneqarfik Sermersuumit tapersersorneqartigata aasaanerani tammaarsimaartitsisarnivut ingerlassinnaasanngilagut. Kommuneqarfik Sermersuumi pingasoriarluta aasaanerani tammaarsimaartitsivugut, tamatumanilu suleqatigiinnermi Kommuneqarfik Sermersooq pingaaruteqarluinnarsimavoq. Tapersersuisimanngitsuuppat meerarpassuarnut kajumissutsimillu ikiuuttorpassuarnut nuannaarutaasumik annertuumik suliniuteqarnerput piviusunngorsinnaasimanavianngikkaluarpoq”, Nike Berthelsen naggasiivoq.

Aasaanerani tammaarsimaartitsisarnerit pillugit paasissutissat piviusut

Illoqarfeeqqami aasarsiorneq meeqqat ilaannut sivisoorujussuartut misinnarsinnaasarpoq. Atuarfik, klubbi timersortarfillu aasaanerani matoqqasarput, meeqqallu illoqarfigisaminniit allaarlutik aasarsioriartornissaminnut periarfissaqartartut ikittuararsuusarput, tamatumanilu aasaaneranilu tammaarsimaartitsisarnerit Peqatigiiffik Kalaallit Meerataat-mit aaqqissuunneqartartut meeqqanut taakkununnga neqeroorutaapput. Peqatigiiffik Kalaallit Meerartaat-meersut kajumissutsiminnillu suliartortut nunarsuarmi nunanit tamalaaneersut illoqarfimmut sapaatit-akunnerini sisamani tikeraariartorlutik tikikkaangata pikkunaalliorneq pinnguaaterpassuarnik timersuuterpassuarnillu, allamiut nerisassaataannik nipilersuutinillu, allamiut oqaasiinik nutaanillu pinnguaqatitaartornermik taarserneqartarpoq. Kajumissutsiminnik suliartorlutik tikittartut nunanit tamalaaneersuusarput. Taiwanimiit Canadameersuusarput. Grækenlandimiit Mexicomeersuusarput. Inersimasut nunatsinneersut peqatigalugit illoqarfinni meeqqanut timersuutinik sammisassaqartitsinissanut, allanik assigiinngitsunik sammisassaqartitsinissanut pinnguartitsinissanullu aaqqissuisarput. Kommuneqarfik Sermersooq Peqatigiiffik Kalaallit Meerartaat-meersunik kajumissutsimillu sulisunik pingasoriarluni tikeraartoqareerpoq. Kommuneqarfik Sermersuumi aasaanerani tammaarsimaartitsinerit siullermik Ittoqqortoomiini 2015-imi aappassaanillu Ittoqqortoormiini Paamiunilu 2018-imi ingerlanneqarput. Tamatuma saniatigut Peqatigiiffik Kalaallit Meerartaat Qaanaami Avannaata Kommunianiittumi (2014, 2017) taamatuttaaq Nanortalimmi Kommune Kujallermiittumi (2016) aasaanerani tammaarsimaartitsivoq. Qaasuitsup kommuniata nunaqarfiani Kullorsuarmi Kitaaniittumi taamatuttaaq Kommune Kujalliup illoqarfiani Nanortalimmi Kitaaniittumi aasaq manna tammaarsimaartitsisoqassaaq.

 

“Nunarsuarmi nunanit tamalaaneersut Kommuneqarfik Sermersuumut tikikkaangata pisartut”

Kommuneqarfik Sermersuumi aasaanerani tammaarsimaartitsinerni assilisat

Saqqummersitsineq Katuami Nuummiittumi sisamnngornermi maajip qulingiluaani ualikkut sisamanut ammarneqassaaq.