21.08.19

Naligiissumik ataatsimooqatigiinnerit Inuusuttunik Katerisimaartitsinermi pipput

Meeqqat Peqatigiiffik Kalaallit Meerartaat-meersut Inuusuttunik Katerisimaartitsinermi peqataatinneqarneqaraangata naligiissumik ataatsimoorneq ukkatarineqartarpoq.

Inuusuttuaqqanik Katerisimaartitsineq “Takuiuk”-mik (Ser du det”) qulequtserlugu ingerlanneqarmat Peqatigiiffik Kalaallit Meerartaat-meersut peqataapput. Aappassaanik ukioq manna peqataavugut, “meerartavullu” tamatumuuna peqataatinnerujussuuagut. Suliniutilerinermi aqutsisoq Louise Maud Schäffer ima oqaluttuarpoq:

”Inuusuttuaqqanut uagutsinnit aaqqissuussani sammisassaqartitsinerni peqataasunut sullissiinnarata inuusuttuaqqat suleqatiginerisigut suliatigut angusaqarnerusalernissarput kissaatigaarput. Inuusuttuaqqanik Katerisimaartitsinermi qulequttat ullormut oqaluuserisassatut toqqarneqartut inuusuttuaqqanit aalajangerneqartarput, tamatumanilu inuusuttuaqqat eqqartueqatigiittarput, naapittarput aamma imminnut isumassarsiorfigisarput. Taamaattumik Inuusuttuaqqanik Katerisimaartitsinermi peqataasut nuannisartaqaat”.

Inuusuttuaqqanik Katerisimaartitsineq siorna ingerlanneqarmat Kalaallit Nunaata ilisimaneqarnerulernissaa isummallu pigiliutiinnakkat nungusarneqarnissaat pingaarnertut anguniagarineqarput. Peqatigiiffik Kalaallit Meerartaat-mit ukioq manna aalajangerneqarpoq ataatsimoorluta atukkavut  –  tassa imaappoq, amitta qalipaataat, inuiaassutsivut upperisavullu tunngavigalugit ataatsimoorluta atukkatigut assigeequtivut – eqqartueqatigiinnikkut ukkatarineqassasut.

Louise ima nassuiaavoq: ”Naligiissumik ataatsimooqatigiittoqartalernissaanut iliuuserisinnaasavut ukkataraavut. Inuusuttuaqqat Peqatigiiffik Kalaallit Meerartaat-meersut isummat pigiliutiinnakkat aallaavigalugit asissuisartunik siumugaqartarsimasut siumugaqartartullu amerlavallaarput. Taamaattorli assigeequtivut ataatsimullu atukkavut ukkatarinerisigut ataatsimut pissuserisassatsinnik pilersitsisarpugut, taamaaliornikkullu isummanik pigiliutiinnakkanik nungusaaqataasinnaavugut. Asissujuitsuunissamulli aqqutissiuinissarput pisariaqarpoq, tamannalu inuusuttuaqqanut unammillernartunik Inuusuttuaqqanik Katerisimaartitsinermi sammisaqartitsinikkut anguarput. Oqarsinnaavugut inuusuttuaqqat ileqqunik allanguinissatsinnut immitsinnullu akuersaarnerulernissatsinnut maligassiuisuullutillu aqqutissiusuussasut”.

Sammisaqartitsinerit workshoppertitsinerillu Peqatigiiffik Kalaallit Meerartaat-mit aaqqissuunneqarput. Taakku ilaat timi aalatillugu takutitsisartup Serbiamiuusup Marian Abramovicip inunnut isaasigut toqqarlugit nakkussinermik piginnaasallip isumassarsivigineratigut pilersinneqarpoq.

”Inummut isaasigut toqqarlugu nakkussineq ajornaatsorinarsinnaavoq, allamulli qissiminnaveersaarneq killissamik qaangiinertut misiginartarlunilu tamaviaarnartarpoq. Inuk isaasigut toqqarlugu nakkukkaangatsigu minutsialunni immitsinnut ilisaritittarpugut, aamma inuttut ammartarpugut periusissaaleqisarlutalu, taamaaligaangattalu inuk nakkutarput pillugu isummavut pigiliutiinnakkavut ilisimariikkavullu attakkuminaassisarput. Amiata qalipaataa inuiaassusaalu eqqumaffigerpiarunnaartarpavut”, Louise nassuiaavoq.

 

Inuusuttuaqqat soqutigisaat aallaavigalugit oqalugiarnerit, nipilersornerit, workshoppertitsinerit oqaloqatiginninnerillu Valbyparkenimi ulluni marlunni; septembarip tallimaani arfernanilu pissapput. Peqatigiiffik Kalaallit Meerartaat ulluni marlunni taakkunani peqataassaaq. Inuusuttuaqqanik Katerisimaartitsineq pillugu paasissutissat amerlanerusut uani atuarsinnaavatit

Peqatigiiffik Kalaallit Meerartaat-p Inuusuttuaqqanik Katerisimaartitsinermut atatillugu aaqqissuussai ilaatigut aningaasaateqarfimmit Smukfondenimit aningaasaliiffigineqarput