24.09.21

Kullorsuarmi pitsaasunik kinguneqartitsineq

Kuluk Kullorsuarmi tammaarsimaarnermi ”Camp Kulloq”-mi nammineq kajumissutsiminik tammaarsimaarfimmi pisortaavoq: ”Piffissap sivikitsuinnaap ingerlanerani ataatsimooqatigiinnermut nuannerluinnartumut peqataalerpunga ", oqaluttuarpoq.

Kuluup Camp Kullormit eqqaamasaasa ilagaat, inussiarnersumik tikilluaqqusaaneq aamma Kullorsuarmi ataatsimooqatigiinneq pilersinneqartoq. ”Uannut annertuumik misigisaqarfiuvoq”, taama oqarpoq Kuluk, maanna Nuummut utersimalerluni Nuuk Nordisk Kulturfestival-imik 28. – 31. oktober ingerlanneqartussamik piareersaaqataaleruttortoq. Kuluk Helmsimik kinguliaqarpoq, 31-nik ukioqarluni, Nuummi najugaqarluni, isiginnaartitsisartutut ilinniagaqarluni – aasarlu Camp Kullormi tammaarsimaarfimmi pisortaalluni, tassalu aasaanerani tammaarsimaartitsinerit marluk Kalaallit Meerartaasa najukkami suleqatit peqatigalugit ingerlassaasa aappaanni.

Kuluup ilinniarnermi ilaa Londonimi ingerlannikuuaa, oqaatsinillu piginnaasaqarnini ilaatigut atorluarlugu meeqqat inuusuttullu tuluttut ilinniartittarlugit, taamaammallu aamma meeqqanik inuusuttunillu sullisserusunnini tunngavigalugit Kuluk nammineerluni Kalaallit Meerartaannut qinnuteqaateqarpoq.

Misigisaq annertoqisoq

”Isumaqarpunga meeqqat inuusuttullu nuannersunik misigisaqartinnissaannik ataatsimoorluta kissaateqarnerput, ataatsimooqatigiilluarnermik Kullorsuarmi misigisannik pilersitsisuusoq”, Kuluk oqarpoq. ”Kullorsuarmi namminneq kajumissutsiminnik sulisunit ammasumik inussiarnisaarnermik annertungaartumik naapinneqarpugut. Nukitik tamaasa Camp Kullup ingerlannissaanut atorpaat. Tamanna peqataaffigalugu kajumissuseqalernaqaaq nuannerluinnarlunilu”, Kuluk oqarpoq.

Kuluk isumaqarpoq, kalaallit inuiattut tarnigat tamatumani akissutissaasut ilagigaat: ”Kalaallit kulturiat ataatsimoornermik pingaartitsisorujussuuvoq. Avitseqatigiittarneq ikioqatigiinnerlu tunngaviusumik atugassarititaapput, ataatsimooqatigiiffimmullu tunniussaqarnissaq pissusissamisuuginnartutut isigineqartarluni. Tamanna Kullorsuarmi annertuumik misigivara”, Kuluk oqarpoq, isumaqarlunilu tammaarsimaarneq pitsaasunik kinguneqartoq. ”Ajoraluartumik corona pissutigalugu sioqqutsisumik tammaarsimaarneq unitsittariaqarparput  naak soorunami sapaatip-akunneri marluk pilersaarutaasut tamakkerlugit tamaaniikkusukkaluarluta. Kisianni meeqqanik inuusuttunillu sammisaqartitsinerpassuagut ersarissumik ilassilluarneqarput, saqqummiussagut tamaasa ammaffigalugit alapernaalluarpaat”, Kuluk oqaluttuarpoq nangillunilu: ”Assersuutigalugu Alaskami Yuppiit qitittaasiannik ilinniartitsivunga, ullunilu tulliuttuni assut tulluusimaarutigaara, takusinnaagakku namminneerlutik alloriartarnerit aalaatsillu sungiusaraat. Qularinngilara tammaarsimaarneq Kullorsuarmi meeqqani inuusuttunilu pitsaasunik pingaarutilinnillu kinguneqartoq”.

Kullorsuaq Kitaaniippoq, 453-it missaanni inoqarluni. Kullorsuaq Upernaviup eqqaani nunaqarfiit avannarlersaraat. Sikuutinnagu (juli – oktober) umiarsuarmik sapaatip-akunnera allortarlugu pajuttoqartarpoq. Ukioq kaajallallugu sapaatip-akunneranut pingasoriarluni helikoptereqartarpoq, kisianni arlalitsigut sila taarlu ajornartorsiutaasarput. Nunaqarfimmi aalisarneq piniarnerlu inuussutigineqarput, kisianni innuttaasut amerlasuut piffissap ilaani pissakilliortarput, aalisarnermut sikusarnera apeqqutaasarmat, piniakkallu killilersugaallutik. Atuarfik 1.-10. klassimi atuartoqarpoq 80-inik.

Pilersaarutit malillugit Camp Kulloq 13. julimiit 1. augustimut ingerlanneqartussaagaluarpoq, kisianni Corona pissutigalugu sapaatip-akunneranik sioqqutsilluni tammaarsimaarneq taamaatittariaqarpoq. Camp Kulloq susassaqartunit arlalinnit ingerlanneqarlunilu tapiiffigineqarpoq, taakkununnga ilaallutik Avannaata Kommunia, Nunafonden, Tips og Lotto Pulje C, Inuuneritta Puljen aamma Den Grønlandske Fond.

Camp Kullup saniatigut Kalaallit Meerartaat aamma Kommune Qeqertalimmi Qeqertarsuarmi tammaarsimaartitsipput.