26.01.21

Kinguaassiuutitigut innarliinernut tunngatillugu ataqatigiissakkamik suliniuteqartoqartarnissaa pisariaqarpoq

Politiit nalunaarusiaanni saqqummeqqammersumi kinguaassiuutitigut innarliinerit nalunaarutigineqartanerinut akimmiffiusartut qulaajarneqarput. Nalunaarusiami tikkuarneqarpoq susassaqarfiit akimorlugit suleqatigiittarnerup pitsanngorsarnissaa pisariaqartoq, suliat pitsaanerpaamik suliarineqassappata.Nuummi allattoqarfimmi pisortap Julie Lynge-p oqartussaasut akornanni suleqatigiinnerup pitsanngorsarnissaa isumaqatigaa, tassuunakkut ataqatigiissakkamik suliniuteqartoqartaleqqullugu.

Kalaallit Nunaanni Politiit nalunaarusioqqammerput, kinguaassiuutitigut innarliinerit nalunaarutigineqartarnerinut akimmiffiusartut qulaajarneqarfigisaannik. Nalunaarusiami tikkuarneqarput kinguaassiuutitigut innarliinerit nalunaarutigineqartarnerinut akimmiffiusartut nungusarniarlugit suliniutissanut inassuteqaatit qulingiluat, tassaalersussat kinguaassiuutitigut innarliisarnerit annikinnerpaatinnissaat anguniarlugu suliniutissat. Inassuteqaatit ilagaat oqartussaasut akornanni suliat akimorlugit suleqatigiinnerup pitsanngorsarnissaa. Tamanna oqartussaasunik tatiginninnermik pilersitsissasoq, nalunaarusiami erseqqissarneqarpoq. Nuummi allattoqarfimmi pisortaq Julie Lynge isumaqataalluinnarpoq.

”Suliassanik pineqartunik aaqqissugaanikkut suliarinnissinnaasoqarnerata innuttaasunit tatigineqarnissaa annertuumik pisariaqartinneqarpoq. Tatiginninnerullu tamatuma pilersinnissaanut aqqutissaasut ilagaat, oqartussaasut aamma isumaginninnikkut suliniuteqarfiit, suliap ingerlanerani tamarmi innuttaasut ikiorniarlugit suleqatigiissinnaanerisa uppernarsarnissaat. Najorti aqqutigalugu naapittarpagut meeqqat kinguaassiuutitigut innarlerneqarsimasut. Meeqqat taakku pitsaanerpaamik ikiorneqassappata, pingaarluinnarpoq, inersimasut meeqqap eqqaaniittut qanimut suleqatigiinnissaat. Taamaaliornikkut meeraq pitsaanerpaamik ikiussavarput,” Julie Lynge – ulluinnarni qanimut suleqatigiinnissap qanoq pisariaqartigineranik misigisaqartartoq – oqarpoq. ”Politiinik, isumaginnittoqarfimmik oqartussaasunillu allanik suleqateqartarnissaq ingerlaavartumik annertusarniartuarparput, misigisaratsigu meeqqat annertuumik iluaqutigisaraat, imminnut tunngatillugu suliat ataqatigiissagaanerat aamma meeqqamut tunngatillugu oqartussaasut naapertuuttut tamarmik qanimut suleqatigiiinnerat. Tamanna meeqqami toqqissisimananngilluinnartumik atugaqartumi, eqqissinermik toqqissinermillu pilersitsisarpoq. ”Oqartussaasut akornanni suleqatigiinnerup pitsanngorsarnissaa tamakkiisumiik taperserparput,”  Julie Lynge oqarpoq.

Nalunaarusiaq uani takuuk

Najortit pillugit annertunerusumiik paasissutisssaqarpoq uani aamma Najorti Facebook-imi malinnaavigisinnaatat:  www.facebook.com/najorti