25.06.20

Kalaallit Nunaanni meeqqat pisinnaatitaaffiinik politikkikkut ukkassineq

Inatsisartut Naalagaaffiit Peqatigiit Meeqqat pillugit Isumaqatigiissutaata tamarmiusup nunatsinni tamarmi atuutilernissaanik qulakkeerisussamik iliuusissatut pilersaarusiortoqarnissaanik akuersipput. “Tamanna nunatsinni meeqqanut tamanut nutaarsiassatsialaavoq”, Julie Lynge Kalaallit Meerartaanneersoq oqarpoq.

Naalakkersuisut Naalagaaffiit Peqatigiit Meeqqat pillugit Isumaqatigiissutaata tamarmiusup nunatsinni tamarmi atuutilernissaanik qulakkeerisussamik iliuusissatut pilersaarusiornissaasa akuerineqarnera Kalaallit Meerartaannut nutaarsiassatsialaavoq. Kalaallit Meerartaata Nuummi allattoqarfiani pisortaq, Julie Lynge, ima oqarpoq: ”Meeqqat pisinnaatitaaffiisa politikkikkut ukkatarineqarlualernerat nuannaarutigeqaarput. Tamatumunnga atatillugu politikkikkut ukiuni kingullerni suliniutigineqartut arlaliupput, tamatumani meeqqat tapersersorneqarnissaannut nutaamik inatsisiliortoqarluni. Taanna nunatsinni meeqqat inuusuttullu isumaginninnikkut sullitat suliani imminnut tunngasuni illersorteqarsinnaanngornerannik kinguneqarpoq.