26.08.20

“Kalaallit Meerartaasa takorluugaat uanga takorluukkannut naapertuupput”

Stina Berthelsen Sværd Nuummi Najortimi ataqatigiissaarisuunngoqqammerpoq. Sulinummik aqutsisoq Najortimilu ataqatigiissaarisorlu alla peqatigalugit, Kalaallit Nunaanni meeqqat oqartussanik naapeqateqarnerminni illersuisoqartarnissaat qularnaarniarlugu sulipput. Stina 39-nik ukioqarpoq, Nuummilu uinilu meeqqatillu najugaqarlutik. Meeqqaminnut pingasunut – suli angajoqqaaminni najugaqartunut – angajoqqaajunermik saniatigut, Stine uinilu aamma meeqqanut tassanngaannartumik angerlarsimaffimmik avataanut inissinneqartunut angajoqqaarsiaasarput.

Sooq Kalaallit Meerartaanni atorfik qinnutigiviuk?

Najortimi ataqatigiissaarisutut atorfimmi piumasaqaataavoq inatsisinik, sulianik suliaqarnermik aamma inuussuttunut ilaqutariinnullu tunngasunik ilisimasaqarnissaq. Ilisimatusarfimmit inunnik isumaginninnermut tunngasunik bacheloritut, ukiuni qulini pisortani aamma katsorsaanermullu tunngasunik sulisimanera, kiisalu ilinniakkat marluk maanna ingerlatakka – tassalu psykoterapeutitut Ilisimatusarfimmilu inatsisilerituutut – pissutigalugit isumaqarpunga atorfik uannut naapertuulluinnartoq. Tassami suliassakka suliamut atatillugu soqutigisannik tamanik imaqarput. Suliassama uannut uangalu ilisarnaatigisannut naleqquttuunerisa saniatigut, aamma Peqatigiiffik Kalaallit Meerataat sullikkusuppara, uanga isumaqatigisannik anguniagaqarlunilu takorluugaqarmat. Isumaqarpunga Peqatigiiffik Kalaallit Meerartaat ineriartornissamut annertuumik sammisuusoq ilutigisaanillu annertuumik akuersaartumnik periuseqartoq – suleqatigisartakkaminut aamma meeqqanut inuusuttunullu suliniutinut peqataasartunut. Meeqqanik isiginneriaaseq uanga meeqqanik inuusuttunillu suleriaatsinnut naapertuuttuuvoq.

Suliassat pingaarneq sunaava?

Pingaarnertut suliassariavara meeqqat inuusuttullu najortimut meeqqat najugaqarfianiit sulisinnaasumut, innersuuttarnissaat. Kommunini sulianik suliaqartunit saaffiginnissutit suliarisassavakka, aammali meeqqani inuusuttunillu maannakkorpiaq atugarisatik aallaavigalugit ikiortissarsiortunik saaffiginnissutit suliarisassallugit. Meeqqat inuusuttullu, kommunit najortillu akornanni ataqatigiissitsisutut isigineqarsinnaavunga. Aamma najortinngortussat ilinniartittassavakka, sulianillu suliaqartut najortinik suleqateqartarnissaannut piginnaanngorsartarlugit. Aallartilluarnissara qilanaareqaara, neriuppungalu najortit suli nukittunerulernissaannut siammaannerunissaannullu peqataasinnaajumaarlunga.

Sooq Najorti suliniutaava pingaarutilik?

Meeqqat, inuusuttut ilaqutariillu atugarisaasa pitsaanerulernissaat sulissutiugissallugu soqutigiuarpara. Najorteqartitsisarnermi pineqartoq tassaavoq meeqqat sanngiinnerpaat illersornissaat, tassalu meeqqat isumaginninnikkut suliassamut ilaalersut. Pingaartorujussuuvoq meeqqat pitsaasumik pineqarnissaat, nipaasalu tusarneqarnissaat. Tamanna uannut pingaaruteqaqaaq, ilungersorlunga sulissutigiumasara. Najorti tassaavoq Kalaallit Nunaanni meeqqat pisinnaatitaaffiinik suliaqarnermi toqqammavissaq pingaarutilik.

Sulilernissannut tunngatillugu suna qilanarinerpaaviuk?

Pingaarnertut qilanaarinerpaavara Najortit siammaanneqarnissaat anguniarlugu sulinissara, Kalaallit Nunaanni meeqqat isumaginninnikkut suliamut ilaalissagunik tamarmik illersorteqarsinnaanissaannik anguniagaq anguniarlugu, tamannalu anguneqassappat pisariaqarpoq sulianik suliaqartut tamarmik sulinerminnut atatillugu Najortimik ilaatitsisarnissaat. Sulianik suliaqarnermik ukiorpassuarni misilittagaqarpunga, taamaammat unamminartut, akimmiffiusartut sulinermilu atugassarititaasut nalunngilakka. Isumaqarpunga kommunini sulianik suliaqartut suleqatiginerisa patajaallisarnissaannut, pitsaasumik aallaavissaqarlunga. Tamanna qilanaarivara, aamma qilanaarivakka ilinniartitsisalernissara suleqatitaamalu ilikkarluarnissaat.

 

Najorti pillugu annertunerusumik atuagassat uaniipput

 

Najorti Isumaginninnermut Inatsisinillu Atuutsitsinermut Naalakkersuisoqarfimmit, Pitsaaliuinermut Isumaginninnermullu Aqutsisoqarfimmit aamma Nunafonden-imit kiisalu Foreningen Østifterne-mit tapersigaavoq.