23.10.19

Kalaallit Meerartaasa Peqatigiiffianni sulilerlaaq: Britta-Marie najortinut ataqatigiissaarisutut Nuummi atorfinittoq

Britta-Marie Juliana Nielsen najortinut ataqatigiissaarisutut Nuummi atorfineqqammerpoq. Suliniutilerinermi aqutsisoq najortinullu ataqatigiissaarisoq alla suleqatiginerisigut nunatsinni meeqqat - oqartussaasut suliffeqarfiutaanneersunik ataatsimeeqateqartussat - najortimik illersuisoqartarnissaannik qulakkeerinnittuusassaaq.

Kalaallit Meerartaasa Peqatigiiffianni atorfittaannut sooq qinnuteqarpit?

Atorfittaannut inuttassarsiuut takugakku soqutiginnilerpunga. Meeqqat atuarfianni ilinniartitsisuuninni meeqqanik sullissineq sungiusimavara, taamanikkullumi meeqqanik atugarliortunik soorunami naapitaqartarpunga. Najortinut ataqatigiissaarisutut sulininni iliuuseqaqataanissannut meeqqanullu inersimasumik tapersersorteqarnissaminnik pisariaqartitsisunut ikiuunnissannnut periarfissaqarpunga.

Aaqqissuussap Najortip ingerlanneqarnissaa sooq pingaaruteqarpa?

Meeqqat pisinnaatitaaffiinut tunngasunik aallussaqartuugatta pingaaruteqarpoq. Meeqqat isumaginninnermi imminnut tunngasumik sullissat najortimik illersuisussaqarsinnaatitaasussaapput. Tamatuma qulakkeerneratigut meeqqat atugarliornerpaat sernissorneqarsinnaammata, tamannalu pingaaruteqarpoq. Meeqqanut inuusuttuaqqanullu atukkatigut atugarliortunut assigiinngitsorpassuartigut akunnermiliuttuuuvugut. Meeqqammi taakku isumaginninnermi sullinneqarnerminnut atatillugu oqartussaasut suliffeqarfiutaasa aalajangiineranni arajutsisinneqartussaanngiivipput. Inersimasunik isumaannik ingerlatitseqqiisinnaasunik illersorteqarnissaminnut piumasaqarsinnaatitaapput. Najortimik taallugu aaqqissuussarput  meeqqat pisinnaatitaaffiinik tapersiisinnaanissatsinnut naapertuinissatsinnullu periarfissaqartitsisuummat pingaaruteqarluinnarpoq.

Pingaarnertut suliassat suua?

Najortitut tassa meeqqanut illersuisutut atuuffeqarlutik Kalaallit Nunaanni sumiiffinni amerlasuuni sulisut 16-upput. Meeqqat uagutsinnut saaffiginnittut najortimik sulianik imminnut tunngasunik ingerlatsinermi peqataasinneqartartussanik illersuisoqartinnissaat pingaarnertut suliassaraara. Isumaginninnermilu suliat meeqqanut saaffiginnissimasunut tunngasut najortinit peqataaffigineqartut aamma malittareqqiivigisartussaassavakka.

Najortimik taallugu aaqqissuussaq tunngavigalugu sulinivit pitsaaqutai suuppat?

Sulilerlaajulluvunga, suleriuserisartakkavullu suli sungiunniarsaraakka. Meeqqalli pillugit isumaginninnermi annertuunik suliaqartartunut akuulernissara eriniginerpaavara. Kommune Kujallermi meeqqanut illersuisussanngortussanik pikkorissaaqqammerpugut, pikkorissaanitsinnilu inutsialannik meeqqanut sullissilersussanik naapitaqarpunga. Inutsialaallu taakku naapitakka nalinginnasumik suliffitsik saniatigut kajumissutsiminnik ikiuunnissaminnut pingaartitsisorujussuullutillu pimoorussisorujussuupput. Taamaattumik ataqqisorujussuuakka.

Najortimik taallugu aaqqissuussarsi tunngavigalugu sulinissinni unamillernarnerpaaq suua?

Isumaginninnermi suliat ingerlanneqartut oqartussaassuseqarfigilertussaannginneri uannut unammillernarnerpaajusussaassaaq. Sulininni suliatigut naammassisaqarluartarnissannut pisussaaffeqarpunga, tamatumalu attannissaa pingaaruteqarsoraara. Isumaginninnermi suliat meeqqanut atugarliortupilussuarnut tunngasut imaluunniit suliat unittoorfioratarsinnaasut sunnertinnanngitsoortanngillat, tamannalu avaqqunneqarsinnaanngilaq. Artorsarnitsinni tapersersoqatigiittarnissarput kaammattoqatigiittarnissarpullu pingaaruteqarpoq.

Najortimik taallugu aaqqissuussassinnut tunngatillugu takorluukkatit suuppat?

Kalaallit Nunaata sineriaani sumiiffinni allani meeqqat najortimik illersuisussaqarnissaminnut periarfissaqalernissaat anguniarlugu Najortimik taallugu aaqqissuussatta siammarternissaa ulapputigaarput. Najorti Kalaallit Nunaanni meeqqat kikkulluunniit isumaginninnermi suliamik imminnut tunngasumik ingerlatsinermi illersuisussaqarnissaminnut neqeroorfigineqartalernissaannut iluaqutaassaaq.