29.03.21

Kalaallit inuusuttut Danmarkimut nuuttut filmi aqqutigalugu ilitsersorneqassapput

Kalaallit inuusuttut Danmarkimut nuukkaagamik, soorlu ilinniariariartorlutik, Danmarkimi aaqqissuussineq paatsuunganartillugulu unamminartissinnaasarpaat. Sumi inissarsiortoqartarpa aamma NemID qanoq atugassaava? Danmarkimi Kalaallit Nunaannilu inuusuttut kalaallit arlallit peqatigalugit Kalaallit Meerartaat Vejle-p Kommunia suleqatigalugu ilitsersuutaasumik filmiliulerput, kalaallit inuusuttut Danmarkimi inuiaqatigiinni aporfigisinnaasaannik sammisaqartumik. Suliniummut taaguutigitinneqarpoq "Alt, hvad du gerne ville have vidst"(Ilisimarusussinnaasaraluatit).

Kalaallit inuusuttut Danmarkimut nuukkaangamik amerlanertigut takorluugaqarlutillu angorusutaqartaqaat. Inuusuttunulli amerlasuunut Danmarkimiilerneq paatsornerpassuarnik aamma oqaatsitigut kulturikkullu aporfinnik naammattoorsiffiusarpoq. Morten Dalegaard Koch Skovlund Vejle-p Kommuniani suliniummik aqutsissuullunilu ilinniagaqartunik inuusuttunillu ilitsersuisartuuvoq, oqarporlu: ”Vejle-p Kommuniani kalaallit inuusuttut tikerarnerat erseqqissumik maluginikuuarput, taamaalillunilu inuusuttut taakku pitsaanerpaamik siunnersorneqarnissaat pisariaqartinneqalerluni. Inuusuttut kalaallit arlalitsigut silarsuarmut allarluinnarmut nunnittarput, arlalitsigullu kiserliortaqalutik. Qanitaminni ilaqutaqartanngillat, Danmarkimilu piumasaqaatinik arlalippassuarnik ilisimasaqarfiginngisaminnik nalaarsisarlutik. Filmit ilitsersuutaasut pingasut siunertarivaat inuusuttut ilisimasaqalersinnissaat, ajornannginnerusumik nammineersinnaaleqqullugit, neriunartumillu Danmarkimut assersuutigalugu efterskoleriarlutik ilinniariartorlutilluunniit nuunnerminni pitsaasumik misigisaqarlutik”.

Filmit inuusuttut Danmarkimeersut Kalaallit Nunaanneersullu qanimut suleqatigalugit suliarineqassapput. Kalaallit Nunaanni inuusuttut apeqquteqartassapput, inuusuttunit kalaallinit Danmarkimiittunit akineqartunik, inuusuttullu FGU-meersut (Piareersaataasumik Tunngaviusumik Ilinniakkat), filmiliortuussallutik.

Ilimagineqarpoq filmit 2021 naalernerani naammassissasut, ilaatigullu nittartagaq inuusuttunut kalaallinut Danmarkimiittunut saaffiginnittoq aqqutigalugu siammaanneqassallutik, nittartagarlu taanna maanna suliarineqarpoq. Saniatigut aamma filmit siammaanneqassapput Kalaallit Nunaanni susassaqafiit naapertuuttut internetikkullu inuttut attaveqatigiittarfiit aqqutigalugit.