30.03.20

Isumaginninnermut Aqutsisoqarfiup suliniut Siammartoq “Periuseq Neriunartoq”-tut nalileraa

Isumaginninnermut Aqutsisoqarfiup suliniuterput Siammartoq nassuiarmagu, suliniutinik innuttaasuni ineriartortitsinermut atugarissaartitsinermullu iluaqutaassussatut qularineqanngitsunik nassuiaanermut najoqqutarineqartartoq “Periuseq Neriunartoq” najoqqutaraa. “Isumaginninnermut Aqutsisoqarfimmit unnersiutigineqarnera nuannaarutigaarput”, allattuuneq Puk Draiby oqarpoq.

“Kalaallit Meerartaanni suliniutivut pillugit eqqortumik nalileeriaaseqarnissarput, nalileeriaaserpullu suliniutitsinnut aalajangersimasunut kinguneqarluarnissaa pingaartipparput. Suliniutitta Siammartup nassuiarneqarnera tassanilu periutsitta neriunarluartutut nalilerneqarnera pillugit tulluusimaarnitta saniatigut suliniutitsinnik periuseq tamanna najoqqutaralugu naliliisitsinerput isumassarsisitsivoq. Sunniuteqarluartussanimmi suliniuteqarnissarput pingaartipparput”, Kalaallit Meerartaanni allattuuneq Puk Draiby oqarpoq.  “Tamannali inunnik sullissinermi qanoq sunniuteqartigissanersoq nalileruminaassinnaasarpoq. Ilami inuup atugai qanoq nalilerneqartarpat, inuillu ataasiakkaat neqeroorutitsinnik neqeroorfigisimanngikkaluarutsigit inuuneminni qanoq killiffeqarsimassagaluarnerpat?

Apeqqutit taamaattut akiuminaattarput. Isumaginninnermut Aqutsisoqarfiup nammineq nalileeriaatsini najoqqutaralugu suliniuterput Siammartoq neriunartumik periuseqarfittut nalilermagu tamanna soorunami nuannaarutigalugulu tulluusimaarutigaarput. Taamaattumik suliniuterput Siammartoq iluaqutaasoq pingaaruteqartorlu uppernarseqqiinnarparput”.

Periuseq neriunartoq suua?

Suliniutinik innuttaasuni ineriartortitsinermut atugarissaartitsinermullu iluaqutaassussatut qularineqanngitsunik naliliinermi periuseq Periuseq Neriunartoq-mik taaneqartarpoq. Periuseq neriunartoq tunngaviatigut aqqanilinnik assigiinngitsunik immikkoortoqarpoq, taakkualu periutsip neriunartuuneranik tikkuussisuusarput. Immikkoortut taakkua aqqaniliusut tamaasa naliliinermut najoqqutassiami, immersugassartalimmi suleriutsimillu annertussusaanik naliliinermi najoqqutarineqarsinnaasumi, erseqqissarneqarput.

Isumaginninnermut Aqutsisoqarfik naapertorlugu immikkoortut uku Siammartup neriunartumik periuseqarfiusutut nalilerneqarneranut tunngaviupput:

  • Periuseq inuit ataasiakkaat naligisaminnik tapersersorteqartinnerisigut piginnaasaallu alaatsinaannerisigut nassuiaalluarnermik ineriartortitsilluarnermillu tunngaveqarpoq. Katerinnerit siunertaqarluartut inuusuttuaqqat qularnanngitsumik siuariartuutigisinnaasaraat ilikkagaqarfigisinnaasaraallu nalilerneqarpoq.
  • Siammartumi anguniakkat periutsimut naleqqussarneqartarput. Taakkualu paatsuugassaanatillu naapertuutissapput, aammalu peqataasut ataatsimoorlutik pisariaqartitaannik inuusuttullu ataasiakkaat anguniagaannik tunngaveqassallutik. Oqaloqatigiinnermut najoqqutassiaq ulloriaasatut isikkulik piginnaasallu allattorsimaffiat inuusuttut anguniagaat pillugit oqaloqatigineranni najoqqutarineqassapput.
  • Periuseq pillugu isummersoqatigiinneq periutsip ilagaa aalajangersimasoq. Assersuutigalugu sulisut sapaatit akunnerini pikkorissartitsineq periutsip immikkoortuini qitiunerpaajusoq pillugu siunersiueqatigiittarnerat inuusuttullu sammisassaqartitsinerit pillugit naliliinermi peqataatinneqartarnerat periutsip ilagaa.

 

Isumaginninnermut Aqutsisoqarfiup suliniummik Siammartumik naliliinera pillugu paasisaqarnerorusukkuit tamannalu pillugu allaatigisaa atuarusukkukku linki una ammaruk

SIammartoq pillugu paasisaqarnerorusukkuit linki una ammaruk

 

Suliniut Siammartoq Velux Fondimit tapiiffgineqarpoq