22.06.21

”Inuusuttunut isumaqassaaq”

Inuusuttuulluni siunissarlu nalornillugu suut pisariaqartinneqartarpat? Pikkoriffiit qanoq nassaarineqarsinnaappat, inuunermilu aqqutissarsiniassagaanni qanoq ikiorneqarnissaq pisariaqartarpa? Inuusuttut 15-it 18-it 28-llu akornanni ukiullit Vejle-mi naapeqatigiikkamik, ukioqatigiiaat akimorlugit ’Siammartoq’-mi naapeqatigiipput nuannersunik misigisaqaqatigiinniarlutik, aammattaarli Siammartoq pillugu misilittakkaminnik oqaluttuarniarlutik – holdit nutaat iluaqutigisinnaasaannik.

Holdit nutaat aasaanerani sunngiffeqarnerup kingorna Siammartumi aallartikkunik, ukiut siuliini sisamani ingerlanneqartarsimasut assinginik ingerlatsissanngillat. Torben Toft Nielsen, Kalaallit Meerartaanni perorsaanikkut suleqataasoq oqaluttuarpoq: ”Uagutsinnut pingaartuuvoq inuusuttut oqaluttuartissallugit, suut nuannarineraat, suut taakkununnga pingaaruteqartuunersut, suullu allaanerusinnaanersut. Tamanna pingaartuuvoq pissutigalugu, taamaaliornikkut pitsaanerpaamik ingerlatsinissap aaqqissuunnissaanut periarfissaqalersaratta, inuusuttunut isumaqarluartussanngorlugu”.

Siammartumi peqataasareernikut ukioqatigiiaat sisamat peqataapput, siunissami Siammartup sunik sammisaqartarnissaa oqallisigineqarmat.

Kingulliunngilaq
Siornatigut Siammartumi peqataasimasut eqqartugaasa ilagaat, mentoreqalernissamut periarfissaqarnissaq, isumassarsiaq arlalinnit ilalerneqartoq. ”Arlallit misigisarput angerlarsimaffik qimallugu, nammineq aningaasaatit aqutarilernissaat ajornakusoortuusoq. Aningaasat naammattusaarnissaat unamminartuusinnaavoq, tamatumanilu arlallit misigisarput inersimasumit imaluunniit mentorimit pitsaasumik tapersersorneqarsinnaallutik”, Torben oqaluttuarpoq –  taanna Vejlemiit uteqqammivoq, amerlasuunik isumassarsitinneqarsimalluni: ”Ulloq nuannivippoq, pissarsiagullu annertupput, suliniutip inerisaqqinnissaanut atorsinnaasagut. Inuusuttut tamarmik gruppiminni ataatsimooqatigiiffinnut nukittuunut ilaapput.  Katillugit ukioqatigiiaat sisamat peqataapput, naallu ilaat siornatigut imminnut takunikuunngikkaluarlutik,ersarippoq Siammartoq ataatsimoorukkaat, inuusuttullu arlallit isumaqatigiipput ukioqatigiiaat akimorlugit naapeqatigeeqqinniarlutik. Aatssaat ukioqatigiiaat akuleriisillugit misiliivugut, kisianni kingulliussanngilaq”, Torben naggasiivoq.

 

Siammartoq sunaava?

Siammartoq tassaavoq ukiup aappaa affarmik sivisussusilimmik ilinniartitsineq, inuusuttunut namminneq kajumissusertik naapertorlugu sulinissaannut najukkaminnilu ataatsimooqatigiiffinnut ilaalernissaannut piginnaanngorsaaviusoq. Aammattaaq aqqutaani inuunerminni allatigut atorsinnaasaminnik ilisimasaqalerlutillu pisinnaasaqalersarput.

 

Siammartoq pillugu filmi takuuk