08.05.19

Ilaqutariiaat nunatsinneersut Børns Vilkårimut tunniussassanik katersuiniaqqammerput

Ilaqutariaat sisamat qammatit qulinik utoqqaassusilinniit 16-inik ukiulinnik meerartallit Peqatigiiffik Kalaallit Meerartaat-mi ilaasortaasut aningaasanik katersuiniarnermut nakkakaatitsiviulisarlutik Nørrebromi sapaammi marsip 24-ani katersuiniarput. Peqatigiiffik Kalaallit Meerartaat-mut tunniussassaanngitsunik Børns Vilkårilli Meeqqanut Oqarasuaataanut meeqqanit 50.000-nit amerlanerusunit siunnersorneqarnissamik, tuppallersarneqarnissamik imaluunniit inersimasunit tusarnaarneqarnissamik pisariaqartitsisunit ukiut tamaasa sianerfigineqartartumut tunniussassanik katersuiniarput.

Malene Bruun Peqatigiiffik Kalaallit Meerartaat-mi meeqqanut ilaqutariinnullu siunnersortitut sulisuuvoq: ”Meeqqanut Oqarasuaat suliniuteqarnitsinnut pingaaruteqarluinnarlunilu meeqqanut Danmarkimi najugalinnut tamanut neqeroorutitsialaavoq. Aammalumi meeqqanut Peqatigiiffik Kalaallit Meerartaat-mi ilaasortanut, tamannali pingaarnertut matumani pineqanngilaq. Inunnulli ikiorneqarnissamik pisariaqartitseratarsinnaasunut ikiuunnitsinni ikioqatigiinnissarput taamatuttaaq ullormik nuannersumik misigisaqarnissarput matumani pingaarnertut pineqarput”, Malene oqarpoq.

“ Assinganik pineqarnissamik siunertaqarani ajunngitsuliornermik qitornannut maligassiuerusullunga katersuiniaqataavunga”, Nina Singertat oqarpoq.

Meeqqat kisimiitinneqartassanngillat

Nina Singertat erninilu sisamanik ukiulik Casper Danmarkimi Et bedre Liv-imi ilaasortaapput, marluullutillu Peqatigiiffik Kalaallit Meerartaat-meersut peqatigalugit Børns Vilkårimut tunniussassanik katersuiniaqataapput. Anaanatut kisermaajuneq aningaasakilliornartarpoq. Taamaakkaluartoq Nina aningaasanik Børns Vilkårip kontuanut qaammatit tamaasa ikisisarpoq. ” Børns Vilkårimut anaananngoreernerma kingornali tapersersuisalerpunga. Alliartornera sumiginnagaanermik ilaqarpoq. Nalunngilara angerlarsimaffimmi oqaloqatissaqarani paarinissaqaraniluunniit sapaatip-akunnerata naanerani kisimiinneq qanoq misigisimanarnersoq. Meeqqat kisimiitinneqartartussaanngillat. Taamaattumik isumaqarpunga meeqqat inersimasunit pitsaasunit ikiorneqarnissamik pisariaqartitsisut pillugit katersuiniaqataanermut piffissamik atuineq ajunngilluinnartuusoq. Taamatuttaaq assinganik pineqarnissamik siunertaqarani ajunngitsuliornermik qitornannut maligassiuerusullunga katersuiniaqataavunga”, Nina oqarpoq nangillunilu: ”Tamannalu Nanortalimmi alliartornini ilitsoqqussaraara. Ataatarsiara isumaginninnermi ittuunikuuvoq, pigisatsinnillu soorlu atisarpassuarnik meeqqanut allanut atisanik amigaatilinnut tunniussaqarneq meeraanitsinni siusissukkut ilikkarparput”.

Matunut kasuttoqattaarluni mappiussisullu takullugit nuannerpoq.

Katersuiniarnermut nakkakaatitsivilisarluni matumiit matumut kasuttoqattaarluni nuanneqaaq: ”Kasuttorfigisavut tamangajammik mappiussillutillu katersuiniarnermut nakkakkaatitsivinnut nassatatsinnut nakkakaatitsipput, inuillu taakku naapitavut inussiarnerluinnarput”, Nina oqarpoq. Katersavut 3000 koruuninit amerlanerusut aamma naammagisimaarnarluinnarput. Børns Vilkårip sulineranut tapersersueqataanitta saniatigut ilaqutariinnik allanik nunatsinneersunik naapisimaaqateqarpugut: ”Soorlulumi tassa ilaqutamaaginnarluni; ataatsimuualaarpugut, nuannisaqatigiippugut nereqatigiillutalu. Tamannalu erneralu marluulluta nuannareqaarput”.