24.09.21

Berna Café Nuan-imi nammineq kajumissutsiminik sulisuuvoq

Café Nuan Randersimi ammarpoq. Café taanna ilaqutariinnut meerartalinnut Kalaallit Nunaannut attuumassuteqartunut katersuuttarfiuvoq – namminnerlu kajumissusertik naapertorlugu sulisunit ingerlanneqarluni. Berna taakkununnga ilaavoq.

Berna 36-nik ukioqarpoq, Randersillu avatinnguani, aappani ernitillu marluk arfinilinnik qulingiluanillu ukiullit ilagalugit najugaqarlutik. Nammineq kajumissutsimikkut sulisut allat pingasut ilagalugit toqqarsimavaa, qaammat allortarlugu akunnerni sisamani sulisarnissani, Randersimi ilaqutariinnut meerartalinnut kalaallinut sinaakkutissanik pilersitseqataaniarluni. Takorluugaavoq sumiiffimmik ornikkuminarlunilu ilorrisimaarnartumik pilersitsinissaq ilaqutariiulluni isersimaarfigineqarsinnaasumik.

”Kalaallinut ilaqutariinnut ataatsimooqatigiiffimmik pilersitsinissaq isumaqarpunga pingaaruteqartuusoq. Arlallit Kalaallit Nunaannut attaveeruttarput, tamannalu maqaasisaqarnermik nassataqartarpoq. Café Nuan orninneqarsinnaavoq allallu peqatigalugit kaalaallisut oqaloqateqalaarluni, aliannaarsaarusaarlunilu meeqqat allaanerusumik peqatigineqarsinnaallutik, aamma Danmarkimi inuiaqatigiinni aporfiusinnaasunik ikiorserneqarnissaq ajornanngilaq, assersuutigalugu e-boksimik imaluunniit NemID-mik atuinermik. Arlaannarpulluunniit isumaginninnermi siunnersortaanngilaq, sapinngiffitsigulli ikiuuttarpugut, taamaanngippallu allanut immikkut ilisimasalinnut innersuussisinnaavugut – tamanna pisariaqartinneqassappat, Berna oqarpoq.

Kalaallit Nunaannik maqaasisaqarneq

Berna-p Kalaallit Nunaannik maqaasisaqarneq nalunngilaa. Berna affarmik kalaaliuvoq, Kalaallit Nunaanni peroriartorluni, qulinillu ukioqarluni Danmarkimut nuunnikuulluni. ”Isumaqarpunga uattulli Kalaallit Nunaanni peroriartorsimasut amerlasuut Kalaallit Nunaannik maqaasisaqarneq aqqusaartaraat, uangalumi maqaasisaqarnera pissutigalugu, Kalaallit Nunaannut nammineq tunniussaqalaarnissannut kajungilerpunga. Tamanna aamma inuuninni killiffinni piffissaqarlungalu sinnilinnik nukissaqarnera pissutigalugit,”. Berna 2015-imi ernereernermi kingorna sulinngiffeqarpoq,takorlooqqaaraluarlugu Kalaallit Meerartaasa ilaqutariinnut meerartalinnut angalaartitsisarnerini nammineq kajumissutsiminik sulisuunissani, kisianni Kalaallit Meerartaanni sulisumik oqaloqatereernermi kingorna paasivaa anaanat ataatsimoortarfiat ”Anaanat”, allanngueqataaffissatut  imminut naleqqunnerpaasoq. Nammineq nukangasumik meeraqarami tassani nammineq kajumissutsiminik sulisutut kalaallit arnat meeraallu ataatsimooqatigalugit nuannisaqatigisinnaavai, taamani taama Berna eqqarsarpoq.

”Ingerlaannaq akuersivunga”

Ukiualunni nuannersumik ”Anaanani” peqataasareerluni, Berna ukiuni tulliuttuni ilaquttaminik suliffimminillu aallussereerluni, 2021-mi ukiukkut Kalaallit Meerartaanni sulisumit sianerfigineqarpoq. Berna oqaluttuarpoq: ”Tusarakku Kalaallit Meerartaat, ilaqutariinnut meerartalinnut café-mik aallartitsiniarlutik aallartitseqataajumasunik namminneq kajumissutsimikkut sulisussanik ujartuisut, ingerlaannaq akuersivunga. Isumaqarpunga suliniut pitsaasuullunilu pingaaruteqartuusoq. Café Nuan ilaqutariinnut kalaallinut Danmarkimiittunut pitsaasunik atugassaqartitsinermi saniatigut, uannut periarfissiivoq inuuninni nutaanngorsaataasumik allanik nuannaarutissiilaarnissamut. Tamanna uannut sinnilinnik nukissaqalersitsisuuvoq”.

Cafe Nuan uaniittarpoq: Fritidscentret, Vestergade 15, 8900 Randers, sisamanngonerillu allortarlugit nal. 16-imiit 19-imut ammasarluni. Ataatsimoorluni nereqatigiinnerup saniatigut ilaqutariinnut tamanut nuannersunik sammisassaqartitsisoqartarpoq. Peqataaneq akeqanngilaq. 

Nammineq kajumissutsinnik ikiuukkusuppit? Uunga mailerfigitigut: frivillig@fgb.dk qanoq takorluugaqarnerlutit oqaluttuarilaarlugu. Taava uterfigeqqissavatsigit.