06.05.20

Atuarfinnit piumasaqaaterpassuit ilaqutariit ilaannut pisarissersuutaaqisut

Pissutsit coronavirusip ajornartorsiortitsinerani pisarnermisut inngillat, tamannalu Kalaallit Meerartaata suliniuterpassuinut sunniuteqarpoq. Aaqqissugarpassuavut taamaatiinnartariaqarsimavagut, kinguartittariaqarsimavagut – allatulluunniit aaqqissortariaqarsimavagut. Kisianni meeqqat ilaqutariillu atassuteqarfiginissaat aatsaat taama pingaartigaaq.

Mikkel Wullf Schneider Aarhusimi meeqqanut ilaqutariinnullu siunnersortiuvoq. Taassuma suleqatinilu katerinnermut aaqqissukkat qatangiinnartittariaqarsimavaat.

Pingaarnertut suliassarput unamminartoq

Mikkel Wullf Schneider ima oqaluttuarpoq: ”Katerititsisarneq sulinitta annerpaartaraa. Danmarkimi ilaqutariit kalaallit atassuteqarfiginissaat aamma kiserliunnginnissaat angerlarsimaannannginnissaallu qulakkeerumallugit kateritsittarnissaat pingaarnerpaavoq, taamaattumik pingaarnertut suliassarput inuppaaluulluta katerissinnaasimannginnerput pissutigalugu unamminarpoq.

“Ilaqutariit suliniuteqarfigisartakkavut qanippavut, suliniutivullu ilaqutariit ataasiakkaat pisariaqartitaat aallaavigeqqissaarlugit coronavirusip ajornartorsiortitsinerani nalimmassarsinnaavagut”, Kalaallit Meerartaata Aarhusimi meeqqanut ilaqutariinnullu siunnersortia, Mikkel Wulff Schneider, oqarpoq.
“Ilaqutariit suliniuteqarfigisartakkavut qanippavut, suliniutivullu ilaqutariit ataasiakkaat pisariaqartitaat aallaavigeqqissaarlugit coronavirusip ajornartorsiortitsinerani nalimmassarsinnaavagut”, Kalaallit Meerartaata Aarhusimi meeqqanut ilaqutariinnullu siunnersortia, Mikkel Wulff Schneider, oqarpoq.

Ilaqutariilli atuarfinnit nutaanik piumasaqaateqarfigineqariataarsimasut coronavirusip ajornartorsiortitsinerani ikiornissaat suliassatta pingaarnerpaat ilagisimavaat. Angajoqqaat allagarseqattaarsimapput, taamaattumik angajoqqaarpassuit qanoq iliornissaminnik nalornerrassimallutillu iliuusissaalatsipput.

Anaanaq qulingiluanik ukiulimmik ernilik sisamanillu ukiulimmik panilik atassuteqarfigisarpara. Meeqqat taakku angutaat peqqissaasunngoqqammerpoq, taamaattumik napparsimmavimmi sulikulavoq. Meeqqat arnaata atuarfimmiit innersuussuterpassuit pisarissersuutigisimavai. Taamaattumik ernerminut atuartitseriaasissaanik assiliartalersuillunga ilitsersuusiuuppara. Assersuutigalugu ernerata asimi ujagassaata assinginik nassiussivunga. Ernera taamaalilluni nuannaarutigisaminik atuartinneqartutut ilinniartinneqartutullu misigaaq, tamannalu ilutigalugu arnaa atorfissaqartitaminik oqilisaanneqarluni.

Meeqqat ilaqutariillu nittartakkatigut attaveqatigiittarfitsigut annerusumik coronavirusip ajornartorsiortitsinerani atassuteqarfigisarpavut.
Meeqqat ilaqutariillu nittartakkatigut attaveqatigiittarfitsigut annerusumik coronavirusip ajornartorsiortitsinerani atassuteqarfigisarpavut.

Suliniutivut nalimmassarsinnaavagut

“Ilaqutariit suliniuteqarfigisartakkavut qanippavut, suliniutivullu ilaqutariit ataasiakkaat pisariaqartitaat aallaavigeqqissaarlugit coronavirusip ajornartorsiortitsinerani nalimmassarsinnaavagut”, Mikkel oqarpoq, taannalu Aarhusimi suleqatini peqatigalugit inuusuttut amerlavallaanngitsut katerillutik naapisimaaqatigiinnissaannut sammisassaqartitsinernik aaqqissugaqaleruttorput. “Meeqqat tamarmik atualeqqinngillat, ilinniakkerinissamullu ikiorneqarnissamik neqeroorfigineqarnissaminnik pisariaqartitsisunik nalaataqartarpugut. “Kateritsitsisarnissarpulli peqqissutsimut illersorneqarsinnaasumik ingerlattuartillugu aamma pingaaruteqarpoq”, Mikkel oqarpoq.