26.08.20

ALLU aallarteqqippoq

Aasaq qaangiutilerpoq, tamatumalu kinguneraa Kalaallit Nunaanni Danmarkimilu efterskolit inuusuttunik qilanaartunik innukkiartormata. Kalaallinut inuusuttunut Danmarkimi efterskolertunut ikorfartoqatigiiffik ALLU pingaaruteqarluinnarsinnaavoq.

Aasaanerani atuanngiffeqarneq naavoq, inuusuttullu kalaallit amerlaqisut atuarnertik ilinniarnertillu nangittussanngorpaat. Aammattaaq Danmarkimi efterskolini kalaallit inuusuttut atulerput. Kalaallit inuusuttut 200-t missaasa Danmarkimi efterskolernissartik toqqarpaat. Siornanit ikinnerupput, tassami siorna inuusuttut 300-ngajaat Danmarkimi efterskolerput. Qularutissaanngitsumik Corona pissutigalugu nalornineq kalaallit inuusuttut Danmarkimi efterskolertut ikileriarnerannut pissutaavoq, Bjarke Flyvholm, ALLU-mi suliniummik aqutsisoq isumaqarpoq. Kisianni inuusuttunut 160-it missaanniittunut – Corona unissutiginagu – Danmarkiliartunut, ALLU attaveqaatitut ikorfartoqatigiiffittut atuutissaaq – soorlu ukiuni kingullerni sisamani aamma taamaattoqartoq. Bjarke oqarpoq:

”Nalunngilarput amerlasuut oqaatsit kulturikkullu assigiinngissutsit unammillernartoqartissagaat, inuusuttunullu ALLU tassaasinnaavoq ukiumi efterskolerfiusumi iluatsitsilluarnissamut pingaaruteqarluinnartoq. Angerlarserneq aamma inuusuttut Danmarkimi efterskolernerminnik naammassinngitsoornerannut pissutaasinnaavoq. Tamatumanilu ALLU annertuumik ikorfartuutaasarpoq. ALLU-p nalilersorneqarnerani inuusuttut apersorneqartut 85 %-ii oqarput, angerlarsernerup pinaveersaarnissaanut annikillisarnissaanullu ALLU pingaaruteqarluinnarsimasoq, aamma Danmarkimiiginnarlutik ilinniarnerminnik naammassinninnerminnut ALLU pingaaruteqarsimasoq”.

Allu sunaava?

Allu tassaavoq Kalaallit Meerataasa inuusuttunut kalaallinut Danmarkimi efterskolertunut attaveqaatitut ikorfartoqatigiiffittut neqeroorutaa. ALLU aqqutigalugu inuusuttut neqeroorfigineqartarput ukiup atuarfiusup ingerlanerani tallimariarlutik sapaatip-akunnerisa naanerini assigiinngitsunik sammisaqarluni  katerisimaaqatigiinnissamik, tassanilu kulturit naapinneri, angerlarsimaffigisallu maqaasinerata pissuseqarfigisarnera pillugit oqaloqatigiilluarnissamut periarfissiisoqassalluni, aammali inuusuttut siunissartik pillugu pilersaarutaannik sammisaqartitsinisaq siunertaralugu oqaloqatigiinnerit sammisaqartitsinerillu ingerlanneqartarput. Annertunerusumik paasissutissaqarpoq uani.

Ataatsimooqatigiiffimmut peqataagit

ALLU-mut ilanngunniarlutit nalunaarnissat suli angumerisinnaavat. Ukiumi atuarfiusumi 2020/21-mi peqataaniarlutit nalunaarut una toorlugu

 

Tamarmiik ilaatigut Kalaallit Nunaanni Ilinniartitaanermut Aqutsisoqarfimmit tapersigaapput.