12.12.18

Aatsaat taama patajaatsigivugut

Arfininngornermi 24. november ullaakkut siulersuisuni siulittaasoq Kirsten Bitsch tanngassimaarluni nassatassaminik poortuivoq, Aalborgimi Musikkens Husimi Kunngissakkut Isumaginninnikut Nersornaasiuttagaata unnukkut tunniunneqarnissaanut peqataajartulerluni. Kirsten Bitsch Peqatigiiffik Kalaallit Meerartaanni siulersuisunut siulittaasuuvoq. ”Nuannaarlungalu tanngassimaarpunga. Nersornaasigaaneq tuppallernaqaaq”, Kirsten Bitsch oqarpoq.

Kirsten Bitsch naapertorlugu nersornaasigaaneq pivoq, Peqatigiiffik Kalaallit Meerartaata oqaluttuarisaanermini aatsaat taama patajaatsigisumik inissisimanerata nalaani.  ”Peqatigiiffik Kalaallit Meerartaat arlalitsigut ineriartornikuuvoq tassaalerluni suleqatigiiffik nutaaliaq tunngavigissaartoq – aammattaaq Kalaallit Nunaanni. Ilaatigut Nuummi allattoqarfimmi pisortaqalerneq suleqatigiinnernut pitsaasunut patajaattunullu ammaassivoq – Namminersorlutik Oqartussanik kattuffinnillu allanik Kalaallit Nunaanniittunik”, Kirsten oqarpoq nangillunilu:

Ullutsinnut naleqqussarnikuuvugut

”Suleqatigiiffinnik allanik suleqateqarneq suleqatigiiffimmut nutaaliaasumut sunniuteqaqataarusuttumullu pingaaruteqaqaaq, Kalaallit Nunaannilu tunngaveqarnerup takutippaa suleqatigiiffik ullutsinnut naleqqussarsimasoq. Tassami Peqatigiiffik Kalaallit Meerartaat ineriartorsimavoq, 1924-mi peqatigiiffiup aallartinnerani sakialluttunut sanatoorianik Danmarkimiit aqutsisuunitsinniit, maanna suleqatigiiffinngorluni pingaarutilik nutaaliaasorlu, Danmarkip Kalaallit Nunaatalu akornanni naligiimmik suleqatigiiffiulluni”, Kirsten Bitsch oqarpoq nangillunilu:

”Ullumikkut suleqatigiiffitsinnut sulinitsinnullu ilisarnaataapput naligiinneq, ataqqinninneq torersuunerlu”, Kirsten Bitsch oqarpoq immikkullu nuannaarutigalugu nersornaammut inassutiginninneq Kalaallit Nunaanniit saqqummiunneqarmat, tassalu Aviaaja E. Lynge-mit, MIO-mi Meeqqanik Illersuisuusumit.

Kirsten Bitsch Peqatigiiffik Kalaallit Meerartaanni 2015-imiit siulittaasuuvoq

Inuiaqatigiinnit kalaallinit akuerisaaneq

”Kunngissakkut Isumaginninnikkut Nersornaasiuttagaannik nersornaasigaaneq annertuumik nersorinninneruvoq, Bikubenfondenimiit Kunngikkormiuniillu, aammali tassaavoq inuiaqatigiinnit kalaallinit akuersaarneqarneq, taamaalillunilu suliatsinnik, minnerunngitsumillu sulinitsinni periutsitsinnik  nersualaarineq”, Kirsten Bitsch oqarpoq naggasiullugulu nersornaasigaanermut assigiinngitsutigut peqataasimasut qujaffigalugit:

”Peqatigiiffik Kalaallit Meerartaanni immikkoortortaqarfinni qaffasissutsinilu tamani ulluinnarni qasusuilluni suliuarnerit, matumunnga tunngaviupput. Taakkulu tassaapput namminneq kajumissutsimikkut sulisut, atorfilittat, aqutsisut, ilaasortat, aningaasaliisartut suleqatigisartakkallu, ullut tamaasa annertoqisumik suliuartut. Aammattaaq aningaasaateqarfiit puigussanngilagut, taakku peqatigaluta kalaallit meerartaasa ingerlalluarnissaat toqqissisimanissaallu sulissutigaat – Kalaallit Nunaanni Danmarkimilu. Amerlaqaluta nersornaasigaaneq tanngasimaarutigisinnaavarput”.

Peqatigiiffik Kalaallit Meerartaat sinnerlugu assiliisoq: D. Wojtanowicz