06.05.20

Aalborgimi anaanat kalaallit nittartakkakkut oqaloqatigiittarnitik pissutigalugit ataqatigiilertut

Aalborgimi anaanat kalaallit naalungiarsulisarlutik pingasunngornerit tamaasa naapittarput. Coronavirusili pissutigalugu naapissaarallarput, sulili oqaloqatigiittarlutik. Nittartakkakkummi attaveqaqatigiittarfitsigut maanna oqaloqatigiittarput.

Lotte S. Rank meeqqanut ilaqutariinnullu siunnersortiullunilu Aalborgimi anaanat kalaallit naapeqatigiittarfianni akisussaasuuvoq. Anaanat kalaallit naalungiarsulisarlutik pingasunngornerit tamaasa naapittarput. Corinavirusili ajornartorsiortitsilermat naapissaarallartariaqalersimapput. Lottep anaanat kalaallit naapeqatigiittarnerat unitsinnagu nittartakkakkut attaveqaqatigiittarfitsigut oqaloqatigiitittalerpai, tamannalu iluatsilluartoq erserpoq.

Aalborgimi anaanat kalaallit suli oqaloqatigiittarput, tamannalu nittartakkakkut attaveqatigiittarfitsigut maanna pisarpoq. “Allaaneruvoq, sulili oqaloqatigiissinnaanerput isumalerujussuuvoq”, meeqqanut ilaqutariinnullu siunnersorti Lotte S. Rank (qullermi talerperlermiittoq) oqarpoq.
Aalborgimi anaanat kalaallit suli oqaloqatigiittarput, tamannalu nittartakkakkut attaveqatigiittarfitsigut maanna pisarpoq. “Allaaneruvoq, sulili oqaloqatigiissinnaanerput isumalerujussuuvoq”, meeqqanut ilaqutariinnullu siunnersorti Lotte S. Rank (qullermi talerperlermiittoq) oqarpoq.

Nittartakkakkut attaveqaqatigiittarfitsigut oqaloqatigiinneq napeqatigeeriaatsimik allamik pilersitsiffiusoq

”Anaanat kalaallit nittartakkakkut attaveqaqatigiittarfitsigut oqaloqatigiittarnerat qanimut naapittarnerannut soorunami sanilliunneqarsinnaanngilaq, taamaakkaluartoq misilittakkaminnik suli avitseqatigiissinnaallutillu naapissinnaajunnaarallariasaarnerminni immaqa kiserliornissaraluartik pakkersimaarsinnaavaat. Nittartakkakkut attaveqaqatigiittarfitsigut oqaloqatigiikkaangatta ataatsimoortanngilagut, angerlarsimaffiinulli qaaqquneqartutuulli misinnarmat nuannisartarpugut. Taamaalillutami pisunut malinnaasarpugut”. Lotte nassuiaavoq: ”Kaffisoqatigiittarpugut, ilaat ullaakkorsioqqammersimasarput, ilaasa qitornaat angajulliit angerlarsimasarput, taakkulu kiinnaat isiginnaarutikkut nuillatsiartarput, anaanallu ilaat milutsitserujoortarlutik. Qanimut naapittarnitsinnitulli persuarsiorpalaanngitsorujussuusarpugut”.

Coronavirusi kiserliornerulersitsisinnaasoq

Lottep suleqataatalu Kalaallit Meerartaata ilaqutariit atassuteqarfigisartagai coronavirusip ajornartorsiortitsinerani eqqummaariffigisimasorujussuuaat. Ilaqutariit ilarpassuisa ajornartorsiutiminnik namminneq qaangiiniarsarileriasaartariaqartussanngornerat angerlarsimaannaqqusaanerminnilu kiserliornertik pissutigalugu allanik ajornartorsiuteqalersinnaanerat ernummatigisimasaasa ilagaat. Tamarmilli taama nalaataqarsimanngitsut, Lotte isumaqarpoq.

“Qanimut naapeqatigiinneq allaanerujussuuvoq”, Lotte oqarpoq, taassumalu meeraq anaanat kalaallit coronavirusip tuniluutilinnginnerani qanimut naapeqatigiinneranni peqatigigaa assimi takuneqarsinnaavoq.
“Qanimut naapeqatigiinneq allaanerujussuuvoq”, Lotte oqarpoq, taassumalu meeraq anaanat kalaallit coronavirusip tuniluutilinnginnerani qanimut naapeqatigiinneranni peqatigigaa assimi takuneqarsinnaavoq.

”Ilaqutariinni assigiinngitsorpassuarnik pisoqartoq misinnarpoq. Ilaat qularnanngitsumik annikilliorput, taakkulu tapersersornerisigut siunnersornerisigullu ikiorsinnaavagut. Anaanaasinnaavoq atuarfiit ornittakkallu matoqqanerat peqqutaallutik qitornamik tungaatigut ajornartorsiutinik nammineq pakkersimaarinnileriataartariaqalersimasoq, ilaqutariinnili nuannersunik aamma pisoqartarpoq. Meeqqat allatorluinnaq pinnguaqatigeeriaaseqaleriasaalersimasarput, ilaqutariit avataaniit piumasaqaatinut maniguuppiarunnaartutut misigisimalersarsimasarput, tamakkulu namminneq isummatik malillugit iliornissaminnut kiffaanngissuseqarnerulertutut misigisimanerannik kinguneqarsinnaapput. Ilarpassuisami tamanna iluariinnarpaat. Isumalluutimmi ilaat ilungersuaffimmi ineriartortinneqarsinnaasimapput. Tamakkuupput siunissami eqqummaariffigiligassatta ilaat”, Lotte oqarpoq.