Najorti – meeqqat namminneq nipaat tusartariaqarmata

Najorteqartitsisarnikkut qularnaarneqarpoq Kalaallit Nunaanni meeqqat pisortanik naapitsinerminni illersuisoqarnissaat. Taamaalilluni meeraq imaluunniit inuusuttoq inersimasumik peqateqartarpoq, isumaginninnermi suliaq aalajangiiffigineqassatillugu.

Najortitut pikkorissarusuppit? Annertunerusunik paasissutissaqarpoq uani

Najortip suliassaraa qularnaassallugu, meeqqap nipaata isumaasalu tusarneqarnissaat, meeraq kommunimi isumaginninnikkut suliamut ilaatillugu. Meeqqat suliani imminnut tunngasuni peqataatinnissaat inatsisitigut piumasaqaataaginanngilaq aammalu tassaaginnarani meeqqap pisinnaatitaaffigisaa, aammali tassaavoq meeqqami inuusuttunilu  malunnaatilimmik pitsaasumillu allanngueqataasinnaasoq.

Najortt sumi sulisarpa?
Kalaallit Meerartaat najorteqartitsinissamik neqerooruteqarput Aasiaanni, Narsami, Nanortalimmi, Nuummi, Tasiilami, Maniitsumi, Kangaatsiami, Sisimiuni, Ilulissani, Uummannami, Upernavimmi, Qaanaami, Qaqortumi aamma Qasigiannguani.

Najortip tunuliaqutaa:
Kalaallit Nunaanni meeqqat 700-t missaat angerlarsimaffimmik avataanut inissinneqarnikuupput. Meeqqat taakku ilarpassuisa pisinnaatitaaffimmik suuneri aamma iliuusissanik pilersaarusiaq imminnut tunngasoq nalusarpaat, sooq angerlarsimaffimmik avataanut inissinneqarnertik paasinikuusanngilaat suliamullu imminnut tunngasumut akuutinneqanngisaannarnikuullutik – aamma inuunerminnut annertuunik kinguneqartussanik aalajanngiisoqaraluaraangalluunniit. Tamakku tunuliaqutaralugit Kalaallit Meerartaat aamma meeqqat pisinnaatitaaffiinik sullissivik MIO 2014-imi meeqqanik illersuisoqartitsisarnermik aaqqissuussineq – taaneqartoq Najorti – inerisarlugulu pilersinniarlugu isumaqatigiipput. Najorti aaqissuussinertut 2015-imiit ingerlavoq. Anguniarneqarpoq Kalaallit Nunaanni tamarmi Najorti atuutilissasoq 2020-p naalernerani.

Suliniut kikkunnit taperserneqarpa?
Najorti Isumaginninnermut Inatsisinillu Atuutsitsinermut Naalakkersuisoqarfimmit, Pitsaaliuinermut Isumaginninnermullu Aqutsisoqarfimmit aamma Nunafonden-imit, TELE Greenland-imit aamma Foreningen Østifterne-mit tapersigaavoq.

Suleqatigisat:
MIO, Børns Vilkår, Avannaata Kommunia, Qeqqata Kommunia, Kommune Kujalleq aamma Kalaallit Nunaanni Isumaginninnermut Aqutsisoqarfik.

Meeraavit imaluunniit inuusuttuullutit, najortimillu oqaloqateqarnissat soqutigiviuk?
Meeqqat inuusuttullu Kalaallit Meerartaat najorti pillugu saaffigisinnaavaat, telefoni una sianerfigalugu: 290028. Sianerneq akeqanngilaq.

Annertunerusunik paasisaqarsuppit?
Nuummi Kalaallit Meerartaasa allattoqarfiat allattoqarfiullu pisortaa Julie Lynge attavigikkit emailikkut: jl@fgb.dk /najorti@najorti.gl imaluunniit telefonikkut: +299 311011. Aamma atuiagaaraliarput ”Meeqqat nipaat” uani atuaruk:, kalaallisut aamma qallunaatut saqqummersitaavoq.