Kunngissap nuliatalu isumaginninnikkut nersornaasiuttagaannik 2018-imi akissarsitinneqartoq

Kalaallit Meerartaat Kunngissap nuliatalu isumaginninnikkut nersornaasiuttagaannik 2018-imi ataqqinaaserneqarpoq.

Kunngisap nuliatalu nersornaasiuttakkaminnik Kalaallit Meerartaannut ukioq manna akissarsititsinerminnut tunngavilersuutigisatik pillugit Musikkens Husip Aalborgimiittup oqaluttarfiani ima oqaaseqarput:

Meeqqat inuusuttuaqqallu kikkulluunniit tusarnaarneqarnermikkut takorluukkaminnillu piviusunngortitsinissaminnut periarfissaqartinneqarnermikkut inuunerminni isumassorneqarnissaminnut pisinnaatitaaffeqarput. Inuttulli ineriartornissaat qulakkeerumallugu pitsaasunik atugaqartitaanissaat – tassa inuttut ineriartornissaminnut imminnullu tatigilernissaminnut inunnik tapersersorteqarnissaat – pisariaqarpoq. Kalaallit Nunaanni meeqqat tamarmik taama atugaqartitaanissaminnut ajoraluartumik periarfissaqartitaanngillat. Meeqqammi amerlasuut angerlarsimaffimminni eqqissiviilliorfiusartumi isumassuinermillu sumiginnaaffiusartumi alliartortarput, taakkualu imminnut naleqartinnissaminnut tamaviaarlutillu inuunerminni atukkatigut ajornartorsiuteqalikkajupput.

Kalaallit Meerartaanni sulisut meeqqat – Kalaallit Nunaanni Danmarkimilu najugallit – atugaasa pitsaasuunissaat qasusuillutik sulissutigiuarsinnartarpaat. Taakku meeqqat inuusuttuaqqallu nunatsinneersut toqqissisimasumik alliartornissaannik, ilinniakkamik aallartitsinissaminnut periarfissaqartinneqarnissaannik sulianillu imminnut tunngasunik tassa inuunerannut tunngasunik ingerlatsinermi tusarnaarneqartarnissaannik peqataatinneqartarnissaannillu anguniakkatik tunngavigalugit suliniuteqarnermikkut qulakkeerisuusarput.

Kalaallit Meerartaanni peqatigiiffiusumi sulisut ineriartortuartuupput. Kalaallit Nunaanni Danmarkimilu inuiaqatigiinni pissutsit atuuttutigut unamillernartut alaatsinaattuartarpaat –ajornartorsiutillu aaqqiissuteqarfigerusutatik aamma mianeriuartarpaat, alapernaattuartarpaat paasisimasaqarfigiuartarlugillu. Meeqqat inuusuttuaqqallu piginnaasaalittut isigisarpaat – taamatuttaaq meeqqat piginnaasaminnik atuilluarnissaannut periarfissaqartilluarumallugit inuttut ineriartornissaannut tapersersuisarput.

Allattaaneq Puk Draiby nersornaammik akissarsitinneqarnertik pillugu ima oqaaseqarpoq:

Nersornaammik akissarsititaanerput inuppassuit sulilluarnerannik aallaaveqarpoq. Sulisut Kalaallit Nunaanni meeqqanut ilaqutariinnullu ikiorneqarnissamik pisariaqartitsisunut isumaginninnermik aallusseqataasut inuppassuillu inuunerannut pingaarutilerujussuusut ingammik eqqaarusuppakka. Aammali kajumissutsiminnik ikiuuttartut, ilaasortat allallu sulinitsinni annertoqqutigisartakkavut – minnerunngitsumillu aningaasaateqarfiit innuttaasullu Danmarkimi Kalaallit Nunaannilu meeqqat ilaqutariillu ikiorneqarnissamik pisariaqartitsisut pillugit suliniuteqarnermi ikiuuttartut – eqqaarusuppakka. Nersornaammik akissarsititaanitsinnik nuannaarutiginnittuusugut qujaniarusuttuusugullu amerlavugut.

Kalaallit Meerartaata allattuunerata Puk Draibyp Kunngissap nulialu Musikkens Husimi Aalborgimiittumi 2018-imi arfininngornermi novembarip ulluisa 24-anni nersornaasiineranni isumaginninnikkut nersornaaserneqarnertik pillugu Kunngisamut nualianullu qujassuteqartoq assimi takuneqarsinnaavoq. Kunngissap nulialu ukiut tamaasa sisamanik nersornaasiisarput: Kulturikkut nersornaat 500.00 koruuninik aningaasartalik, isumaginninnikkut nersornaat 500.00 koruuninik aningaasartalik kiisalu eqqumiitsuliortunut immikkut piginnaasalinnut nersornaatit Stjernedrysprisinik taaneqartartut marluk 100.00 koruuninik aningaasartallit, filmiliortartorlu Annika Berg Aarhusimilu kajumissutsimik sullissivik Fundamentet Stjernedrysprisimik ukioq manna nersornaasigaapput. (Assiliisoq: Henning Bagger/Ritzau Scanpix)