Anaanat –anaanaqatigiit aallartilluarnermut iluaqutaasarput

Naalungiarsuit inunngoraangata piffissami immikkut illuinnartumi kalaallinik anaananik angajoqqaanngortunillu Suliniut Anaanat ikiuisarpoq.

Naatsumik oqaatigalugu:

Anaanat tassaavoq anaanaqatigiit kalaallit aammalu ilaqutariit kalaallit mikisunik meerartallit Danmarkimi najugallit ataatsimoorfiat. Anaanaqatigiit Danmarkimi kalaallinut ilaqutanngorlaanut ataatsimoorfinnik toqqissisimanermillu pilersitsisarput, aamma soorlu meeraaqqerisunut, kigutinik isumaginnittunut allanullu kommunimi neqeroorutinut attaveqarneq qulakkeerneqartarluni taavalu anaanat ernereernerup kingorna sulinngiffeqareerunik ilinniagaqalernissaannut suliffittaarnissaannullu tapersersorneqartarlutik.

 

Kina peqataasinnaava?

Kalaallit anaananngorlaat taakkulu ilaqutaat Danmarkimi najugallit.

 

Suliniut sumi ingerlanneqarpa?

Anaanat København-imiipput, Aalborg-imiillutik, Esbjerg-imiillutik, Aarhus-imiillutik Vejle-miillutillu.

 

Suliniutip oqaluttuarisaanera:

Anaanat 2014-imili piulerpoq, aallaqqaammut anaananut 0-1-imut ukiulinnik qitornalinnut neqeroorutaasimagaluarpoq maannali aamma anaananut ilaqutariinnullu ulluunerani paaqqinnittarfimmiittunik qitornalinnut neqeroorutaalersimalluni.

 

Sammisartakkat makkuusinnaapput:

Anaanaqatigiit Anaanat sapaatip akunneranut ataasiarlutik naapikkaangamik sulisumik naapitsisarput, ilaannilu aamma kajumissutsiminik sulisumik naapitsisarlutik. Anaananngornermi misilittakkat aammalu anaanat apeqqutaasa unammisassaallu allat oqaluuserinissaanut piffissaqartoqartarpoq. Aamma anaanaqatigiit soorlu meeraaqqerisumit, ernisussiortumit, oqalunniarnermut sungiusaasumit imaluunniit sulisumit allanik sulialimmit pulaarneqartarput. Aamma illoqarfik allatigut atorneqartarpoq, soorlu anaanaqatigiit atuakkanik atorniartarfimmut imaluunniit ornitassanut allanut, meeqqanut inersimasunulu soqutiginarsinnaasunut, pulaartarput. Taavalu aamma anaanat kommunimit allagarsiamik qanoq paasinissaannut ikiorneqartarput, soorlu aamma suliffissarsiuussisarfimmut ataatsimiigiaraangamik illersuisoqartarlutik.

Aamma illoqarfiit ilaanni Anaanat ilaqutariinnut caféqartinneqartarput, taamaaliornerni ilaqutariit imminnut naapittarput nereqatigiittarlutillu, attavissaqalertarlutik ilaqutariinnillu kalaallinik allanik oqaloqateqartarlutik.

 

Peqataaneq sunik pissarsiffiusarpa?

Attaveqatigiiffik pitsaasoq anguneqartarpoq, tassami nammineq atukkanut assingusumik atugalinnik misilittakkat pillugit oqaloqatigiittoqarsinnaavoq aammalu sulisumit ikorfartorneqarneq anguneqartarluni. Danmarkimi kiffartuussinikkut qanoq aaqqissuussaanerup innerata aammalu angajoqqaanngornermi ajornartorsiutaasinnaasut pillugit ikiorfartorneqarnissap ilisimasaqarfiginerulernissaanut periarfisaqartoqartarpoq.

 

Suliniummik aqutsisoq qanoq oqarpa?

“Anaananut taamaalillunilu aamma taakku qitornaannut Anaanat pingaaruteqarluinnarnera qularutissaanngilaq. Anaanaqatigiit taama ittumik ingerlaasillit, anaananngorlaat ilisimasanik periarfissanillu pissarsinissaannik ajornannginnerulersitsivoq. Taavalu anaanat – ilaqutariillu – akornanni susassareqatigiinneq ataqatigiinnerlu nukittooq pilersinneqartarluni. Soorlu anaanat ilaat juullisioqatigiittarput, siusinnerusukkut kisimiittarsimagaluarlutik. Anaanarpassuit, ernereernerup kingorna sulinngiffeqareersimasut, periarfissaqarfimmikkut anaanaqatigiinnut suli takkuttarput, ilaqutariinnut caféqartitsinermut peqataarusuttarlutik.  

Ilutigisaanik ersarissiartuinnarsimavoq, suliamik ingerlatallit suleqatit Anaananut ornigunnissartik qanoq nuannaritigigaat. Soorlu ilarpassui oqartartut ’Kalaallit kulturiat ilisimasaqarfiginerulerparput – angerlarsimaffinnullu pulaarnerni nalinginnaasuni anaanat apeqqutiginngitsuugassaraluaminnik apeqquteqartarlutik,” taama oqarpoq suliniummik aqutsisoq Jeppe Bülow Sørensen.

 

Suliniut kia tapersersorpaa?

Aallaqqaataani Anaanat pilersinneqarput aningaasaateqarfimmit Det Obelske Familiefond-imit aningaasaliiffigineqarlutik maannakkullu aningaasalersuisuupput Satspuljemidler kiisalu Spar Nord Fonden, Lauritzen Fonden, Lions Club Kolt-Hasselager, Logen Pethalpa Aarhus aamma Den sociale fond for børn og unge. Taakku saniatigut aamma kommunemi sulisorpassuit ikorfartuisuupput, tassami suliamut immikkut ilisimasaminnik tunniussisaramik.

 

Paasisaqarnerorusuppit?

Suliniummik aqutsisoq Jeppe Bülow Sørensen, jbs@fgb.dk attavigiuk.